Türkiyə yığmasında son dönəmlərin ən mühüm oyunlarından birinə hazırlıq prosesi tam sürətlə davam edir.

Qardaş ölkənin komandası artıq sabah Priştinada Bakı vaxtı ilə saat 22.45-də başlayacaq oyunda Kosovo ilə gücünü sınayacaq. Bu oyunun qalibi dünya çempionatına vəsiqə qazanacaq.

Vinçentso Montellanın başçılığı altında dünənki məşqdə komanda əsasən bir neçə taktika üzərində çalışdı. Rumıniya ilə oyunu zədə üzündən buraxmalı olan Merih Dəmiral dünən komandadan ayrı məşq etməli oldu. O, fərdi məşq edən yeganə futbolçu oldu.

Bu arada Türkiyə mətbuatının yazdığına inansaq, Montellanın üzərində bəzi futbolçuların Kosovo ilə matçda start heyətində oynadılmaması baxımından ciddi təzyiq qurulur. Söhbət Samet Akaydın, Barış Alpər Yılmaz və Kərəm Aktürkoğludan gedir. Barışla Kərəm Rumıniya ilə oyunda zəif təsir bağışlayaraq sosial şəbəkələrdə ciddi tənqid atəşinə tutulmuşdular. Montellanın sevimlisi olan mərkəz müdafiəçisi Samet isə rumınlarla oyunda pis təsir bağışlamasa da, futbol ictimaiyyətində ''saatlı bomba'' kimi ad çıxarıb. Yəni hər an çox kobud səhvə yol verə və komandaya qənim kəsilə bilər. Ancaq Türkiyə Futbol Federasiyası italiyalı məşqçinin arxasındadı və heyət seçimində ona tam sərbəstlik verib.

Merih Dəmiral tam sağalacağı təqdirdə böyük ehtimalla Sametin yerinə o oynayacaq. Yaxşı formada olan Ozan Kabakın da oynamaq şansı var. Sağ vinger mövqeyində Yunus Akgünün oynamaq ehtimalı yüksəkdi. Bundan başqa Montellanın bu dəfə İsmayıl Yüksəkin yerinə Orkun Kökçüyə şans verəcəyi gözlənilir. Türkiyənin bu gün ilk 15 dəqiqəsi mətbuata açıq olan daha bir məşqi nəzərdə tutulub.

Komanda yerli vaxtla saat 16.30-da özəl təyyarə ilə İstanbuldan Priştinaya yola düşəcək. Saat 19.00-da türkiyəli futbolçular matçın oynanılacağı ''Fadil Vokrri'' stadionunda qısa bir yürüş həyata keçirəcək. Saat 19.15-də isə Montellanın oyunöncəsi mətbuat konfransı nəzərdə tutulub.