Gözlənildiyi kimi, “Benfika” növbəti sanksiyalara məruz qalıb.

"Football-plus.az" xəbər verir ki, UEFA Portuqaliya klubunu Çempionlar Liqasının pley-off mərhələsinin “Real”la oyununda azarkeşlərinin irqçi davranışına görə 40 min avro məbləğində cərimələyib.

Xatırladaq ki, “Real” fevralın 17-də keçirilən oyunda Vinisius Juniorun yeganə qolu ilə qalib gəlmişdi. Braziliyalı futbolçu vurduğu qolu künc bayrağı yanında rəqs edərək qeyd etmiş, bu da azarkeşlərin mənfi reaksiyasına səbəb olmuşdu. Nəticədə, Vinisiusla “Benfika”nın yarımmüdafiəçisi Canluka Prestianni arasında baş verən münaqişə səbəbindən oyun təxminən 10 dəqiqəlik dayandırılmışdı. Bu zaman Vinisius hakimə rəqib oyunçu tərəfindən irqçi təhqirə məruz qaldığını bildirmiş, UEFA Prestianninin cavab oyununda iştirakına qadağa qoymuşdu.

Qitə futbol qurumu martın 25-də “Benfika”ya cərimə tətbiq edildiyini açıqlayıb. Bundan əlavə, Lissabon klubu UEFA turnirləri çərçivəsində keçiriləcək növbəti ev oyununda stadionun 500 yerlik hissəsinin qismən bağlanması ilə bağlı sınaq müddəti 1 illik olan şərti cəza alıb. Həmçinin “Benfika” azarkeşlərinin lazerdən istifadəsinə görə 8 min avro, meydana yad əşyaların atılmasına görə isə 25 min avro cərimələnib. Komandanın məşqçisi Pedro Luis Ferreyra Maşadu qeyri-idman davranışına görə UEFA-nın klub turnirlərində biroyunluq cəza alıb.