Argentina futbolunda ötən ilin sonlarından başlayan qalmaqal getdikcə daha böyük vüsət alır.

"Football-plus.az" xəbər verir ki, ölkə futbolu hazırda rəhbərliklə bağlı tarixinin ən böyük böhranlarından birini yaşayır. Artıq böhranın daxili yarışların təqviminə təsir edəcəyi məlumdu.

Argentina Futbol Assosiasiyasının (AFA) mətbuat xidmətinin məlumatına görə, ölkə çempionatının 5-8 mart tarixlərində keçirilməsi planlaşdırılan oyunları yerli futbol qurumuna qarşı maliyyə fırıldaqçılığı iddiaları səbəbindən təxirə salınacaq. Xatırladaq ki, Argentina Gəlirlər və Gömrük Nəzarəti Agentliyi (AGGNA) bir neçə ay əvvəl AFA-nı vergi borclarını ödəməməkdə ittiham etmişdi. Futbol təşkilatı isə borcları vaxtından əvvəl ödədiyini və bütün öhdəliklərini yerinə yetirdiyini iddia edir. AFA bu iddiasını məhkəmənin ilk iclasında bəyan edib. AGGNA isə öz növbəsində borcların hamısını toplaya bilmədiyini vurğulayır.

Onu da xatırladaq ki, ötən ilin dekabrında AGGNA-nın şikayəti əsasında AFA-nın ofisində axtarışlar aparılıb. Məhkəmə futbol qurumunun prezidenti Klaudio Tapyanı ifadə verməyə çağırıb. O, 2024-25-ci illər ərzində təxminən 13 milyon dollar məbləğində sosial sığorta haqlarını mənimsəməkdə şübhəli bilinir. Məhkəmənin qərarı ilə Tapyanın ölkədən çıxışına qadağa qoyulub. Məhkəmə işi üzrə təkcə AFA-nın rəhbəri deyil, həmçinin onun etibarlı şəxsi Pablo Toviqinyo, təşkilatın xəzinədarının müavini Lusiano Nakis, baş katib Kristian Malaspina və digər rəsmi şəxslər də istintaqa cəlb olunublar. Məmurlar qanunsuz əməliyyatlar hesabına xeyli sərvət toplamaqda şübhəli bilinirlər.

Futbol rəhbərliyi isə bu addımı assosiasiyaya qarşı hücum kimi qiymətləndirib. AFA-nın İcraiyyə Komitəsi Tapyaya dəstək əlaməti kimi martın əvvəlinə planlaşdırılan yüksək liqa və digər divizionların bütün oyunlarını qeyri-müəyyən müddətə təxirə salıb. Beləliklə, yüksək liqada martın 5-dən 8-nə qədər keçirilməli olan 9-cu turun matçları baş tutmayacaq.

Qeyd edək ki, ölkənin məhkəmə sistemi həmçinin bir neçə yerli kluba və milli komandaya sponsorluq edən maliyyə şirkəti “Sur Finanzas”ın mühasibat uçotu təcrübələrini araşdırır. Şirkətin rəhbərliyi mənimsəmədə şübhəli bilinir. Maraq üçün bildirək ki, “Sur Finanzas”a Tapyanın dostu olan biznesmen Ariel Valyexo rəhbərlik edir. Şirkət ötən ilin noyabrında Vergilər Baş İdarəsinin şikayəti əsasında vergidən yayınma şübhəsi ilə istintaqa cəlb olunub.