Hazırda “Ulduz”un formasını geyən bir qapıçı var ki, yaşıdları ilə müqayisədə diqqətləri üzərinə çəkməyi bacarıb. Söhbət Fəxri Səmədlidən gedir.

"Football-plus.az" xəbər verir ki, “Kəpəz”, “Turan Tovuz” kimi komandaların akademiyasında oynamış 14 yaşlı Fəxri Mingəçevir UGİM-inin yetirməsidi.
Cəldliyi, seyvləri ilə seçilən yeniyetmə kiperlə söhbət etmək qərarına gəldik.

- Neçə yaşından futbola maraq göstərirsən? Niyə məhz qapıçı olmaq qərarına gəldin?
- 4-5 yaşımdan. Qapıda özümü daha rahat hiss edirəm. Əvvəllər məşqlərə futbolçu kimi gedirdim. Sonralar qapıçı məşqçimiz Elnar Kərimovun məşqlərini gördüm, məndə qapıçılığa maraq oyandı. Hazırda Ramin Kərimovun yanında fərdi məşqlərə qatılıram.

- Futbolçu olmağı özün istədin, yoxsa ailən?
- Mən istədim. Əvvəlcə nənəm, sonra valideynlərim və əmim dəstək oldu.

- Təhsilin necə gedir? Dərslərlə məşqlər çətinlik yaradır?
- İlk vaxtlar çətinlik yaratsa da, sonralar öyrəşdim. Düzdü, təhsil də vacibdi, amma mənim istəyim güclü qapıçı olmaqdı.

- Kumirin kimdi və niyə?
- Manuel Noyer. Ayaqla oynamaq bacarığı çox xoşuma gəlir.

- Oynamaq arzusunda olduğun komanda var?
- Bəli, əvvəlcə “Mingəçevir”də, sonra “Qarabağ”da və yığma komandada oynamaq istəyirəm.

- Çempionatımızı izləyirsən? Azarkeşlik etdiyin komanda hansıdı?
- Bəli, izləyirəm. “Qarabağ”ın oyunlarını izləyirəm, amma “Mingəçevir” azarkeşiyəm.

MÜZƏFFƏR QULUZADƏ