“Araz-Naxçıvan”ın yeni baş məşqçisi Andrey Demçenko yanvarın 5-dən iş başındadı. Klubla “5 ay + 1 il” müddətində müqavilə imzalayan ukraynalı artıq komandanı məşqlərə çıxarır.

Düzdü, onun ilk məşq prosesində cəmi 12 futbolçu iştirak etmişdi. Bunlardan yalnız biri – Bruno Franko legioner idi. Klubdan verilən məlumatda bildirildi ki, qalan oyunçular da məşqlərə qoşulub. Artıq “qırmızı-ağlar” tam heyətlə mövsümün qalan hissəsinə hazırlaşır.

Bilindiyi kimi, Elmar Baxşıyevin xələfinin qarşısına premyer-liqada mövsümü ilk “üçlük”də başa vurmaq hədəfi qoyulub. Əslində bu mövzuyla bağlı qarışıqlıqdan sizi xəbərdar etmişdik. Belə ki, Demçenko yerli mətbuata müsahibəsində naxçıvanlıların ölkə kubokunda mübarizəni davam etdirdiyini, başqa sözlə, avrokuboklara həm də bu yolla vəsiqə qazanmağın mümkün olduğunu bildirmişdi. Yəni onun komandanın turnirin 1/8 final mərhələsində “Kəpəz”ə uduzduğuna görə kubokla vidalaşmasından xəbəri yox idi.

“Futbol+” bir neçə cəhddən sonra, nəhayət, bu məsələyə aydınlıq gətirdi. Daha doğrusu, klubun icraçı direktoru Eldəniz Yusubov açıqlamasında bu barədə qarşı tərəfədə məlumat vermədiklərini dedi:

Hər halda, ukraynalı bu gün qarşısına qoyulan məqsədə çatmaq üçün nə dərəcədə keşməkeşli yollardan keçməli olduğunu bilir. Axı özü də etiraf edir ki, çempionatda “Sabah”, “Sumqayıt”, “Zirə”, “Neftçi” kimi iddialı rəqibləri var. Düzdü, Masazır təmsilçisinin “futbol ili”ni azı ikinci pillədə başa vuracağını proqnozlaşdırmaq mümkündü. Demçenko bu üzdən yalnız “kimyaçılar”ı, “qartallar”ı və “ağ-qaralar”ı qabaqlamaqla hədəfə çatacağını düşünə bilər.

Bununla belə, o, “Qarabağ”a indidən təslim olmuş kimi görünür. Yoxsa ukraynalı ölkəyə qədəm qoyar-qoymaz “köhlən atlar”ın Çempionlar Liqasının liqa mərhələsindəki uğurlu çıxışından ağızdolusu danışmazdı. Öz aramızdı, bəlkə bunda “Araz-Naxçıvan”ın cari mövsümdə Ağdam təmsilçisinə qarşı keçirdiyi hər iki matçda 5 qol buraxaraq uduzmasının da payı var. Yenə də ukraynalının ümumi vəziyyəti tam təhlil etdiyini düşünmək olmur. Çünki o hələ hansısa müsahibəsində qış fasiləsinə 4-cü sırada yollanan “Turan Tovuz”un adını çəkməyib. Sizcə, “bozqurd”a yuxarıdan aşağı baxmaq olar? Əsla! Kurban Berdıyevin kollektivi ötən “futbol ili”ndə avrokuboklara yollana bilmədiyindən bu mövsümün qalan hissəsində istəyinə çatmaq üçün “dəridən-qabıqdan çıxacaq”. Hələ onu demirik ki, tovuzluların güclü və tələbkar azarkeş ordusu var. Yəqin ki, onlar Kurban Berdıyevin növbəti uğursuzluğuna tolerans münasibət göstərməyəcək.

Kəsəsi, “Qazaxıstanda oldum, hər şeyi gördüm, özümü göstərdim (sonuncu dəfə Qazaxıstan klubu “Jenis”i çalışdıran mütəxəssis bu komanda ilə 14 oyunluq məğlubiyyətsizlik seriyasına imza ataraq 6-cı sıraya yüksəldib və liqanı tərk etmək təhlükəsini sovuşdurub). İndi növbə Azərbaycandadı” sözləriylə iddiasını ortaya qoyan Demçenkoya hələ bir qədər vaxt lazımdı. Görünür, 3-cü pillədəki “Zirə” ilə arada cəmi 2 xal fərqinin olması ukraynalını xeyli arxayınlaşdırıb, loru dildə desək, ağzını sulandırıb. Ancaq Azərbaycan futbolunu əlinin içi kimi bilən Rəşad Sadıqov, ötən mövsümdən ölkəmizdə çalışan Kurban Berdıyev, Sumqayıta bu yay gəlsə də, qısa müddətdə iddialı komanda formalaşdıran Saşa İliç kimi rəqibləri qabaqlamaq asan olmayacaq. Yuxarıda bildirdiyimiz kimi, artıq hansısa səbəbdən, bəlkə də “Araz-Naxçıvan”ın “taktiki gediş”i üzündən kubok şansının olmadığını da bilir.

Odu ki, Demçenkonu çətin 5 ay gözləyir. O, bu çərçivədə həm “qırmızı-ağlar”ın, həm də özünün ölkəmizdəki taleyini müəyyənləşdirməlidi. Özü də yaxşı mənada. Ki, buna məcburdu, Nə ciddi maliyyə sıxıntısı var, nə də heyətdə hansısa çatışmazlıq. Dilinə görə dilçəyinin olub-olmadığını isə zaman gösətərəcək.

KƏNAN BAHADIR