"Qarabağ"ın futbolçusu Marko Yankoviçin "Mozzart Sport"a müsahibəsinin ardı... (2-ci hissə)

- Heç bir avrokubok matçında zəif rəqib olmamısız. Bu mövsüm "Qarabağ"ın oyunlarını izləyən hər kəs komandanın istənilən rəqibə qarşı hücum etmək istədiyini, heç nədən qorxmadığını görüb...
- Xüsusiyyətlərimiz əsasən fiziki hazırlığa əsaslanır. Bu olmasaydı, bu səviyyədə etdiyimiz işlərin bir faizi belə olmazdı. Meydanda bir şeyə nail olmaq üçün fiziki və taktiki cəhətdən yüksək səviyyədə olmaq lazımdı. Eyni zamanda, futbol haqqında bir-iki şey də bilirik. Hamı ilə rəqabət aparmağa çalışırıq. Bəzən yaxşı nəticələnir, bəzən isə sadəcə, buna can atırıq.

- Son üç mövsümdə inanılmaz eniş-yoxuşlar yaşamısız. 2024-cü ilin yazında Avropa Liqasının 1/32 final mərhələsində "Bayer-04"ə qarşı dəlisov oyunlar keçirdiz, sonra 2024/25 mövsümündə Avropa Liqasında sonuncu yerdə qərarlaşdız və bu mövsüm Çempionlar Liqasının pley-off mərhələsinə vəsiqə qazanmaq uğrunda mübarizə aparırsız.
- Bəzi şeylər olur. "Barselona", "Real" və ən böyük klublar bir mövsüm irəliləyiş əldə edirlər, amma növbəti mövsüm bu ardıcıllığı qoruya bilmirlər, çünki bu asan deyil. İndi isə "Qarabağ" kimi komandanə təsəvvür edin. Kimsə gedən kimi, təklif alan kimi və ya məsələn, bizə gələn kimi komandanın tərkibi dəyişir. Eyni zamanda, bəzən hər şeyə nail olduğumuzu düşünürük və bu bizi məyus edir. Ən kədərlisi odu ki, ötən mövsüm Avropa Liqasında çox yaxşı oynadıq, amma heç bir xal toplaya bilmədik (3 xal toplayaraq sonuncu yeri tutublar – red.). Bu mövsüm daha çox motivasiya, yeni oyunçular və enerji ilə başladıq. Şans olmadan çətindi, amma mən həmişə inanıram ki, şans zəhmətlə gəlir. Bu mövsüm şanslıydıq, amma gələn mövsüm eyni komanda çətinliklə Konfrans Liqasına vəsiqə qazana bilər. Komanda daxilində bu cür diqqət və motivasiyanı saxlamaq məşqçi üçün çox çətindi.

“Qurbanov haqqında bütöv bir kitab yaza bilərəm”
- Məşqçi Qurban Qurbanov canlı futbol əfsanəsidi. O, 2008-ci ildən bəri "Qarabağ"a rəhbərlik edir, komandanı doqquz dəfə Avropa Liqasında qrupa, iki dəfə Çempionlar Liqasına və 11 dəfə çempionluğa aparıb. O, inanılmaz bir sıçrayışa nail olub. Qurban Qurbanovun xarakteri necədi?
- Onun haqqında bütöv bir kitab yaza bilərəm. Onun ambisiyası, iradəsi, istəyi və əzmi var... Daim hər mənada inkişaf etməyə və irəliləməyə çalışır və ən əsası bunu oyunçularına ötürür. Əsas məsələ budu. Bu, çox səbr tələb edir, eyni istiqamətdə hərəkət etməli olan 20-30 nəfər tərəfindən daim izlənildikdə asan deyil. Amma 99,9 faiz o, buna nail olur.

- Sorğusuz itaət edilən liderdi?
- O, oyunçularından çox şey tələb edir və son dərəcə tələbkardı. "Qarabağ" hər futbolçu üçün uyğun klub deyil. Bir çox yüksək səviyyəli oyunçu bura uyğun gəlmir. O, xüsusi tipdi. Komandamız əsl ordudu. Nə edilməli olduğunu və nəyin edilməli olduğunu dəqiq bilirik.

- Görünür, karyerasının sonuna qədər "Qarabağ"ı çalışdıra bilər...
- O “bəsdi” deyənə qədər belə də olacaq. Deyərdim ki, komandaların 90 faizi onu “sükan arxasında” görmək və ona şans vermək istərdi, amma Qurbanov kluba sadiqdi. Baş məşqçi küldən bir şeylər qurdu, komandanı dirçəltdi və Azərbaycanı qlobal futbol xəritəsinə saldı. Azərbaycanın dünyadakı ən yaxşı səfiridi. Onun başqa komandanı çalışdıracağını düşünmürəm. O qalacaq, nə qədər müddətə qalacağını bilmirik. Hələ də cəsarəti, motivasiyası və gücü var, onu irəlidə əla nəticələr gözləyir. Qurbanov haqqında filmlər çəkilib, o, çoxlu mükafat qazanıb, adına stadion və ya məşq mərkəzi tikmək barədə söhbətlər gedir. O, sakit, çox sakit bir insandı.

- "Qarabağ" 30 ildən çoxdu işğal nəticəsində viran qalmış Ağdam şəhərində oynamır. Komanda iki stadionda oynadığı Bakıda məskunlaşıb. Liqa oyunlarınıza 4600 nəfərlik “Azərsun Arena” evsahibliyi edir, 30000 nəfərdən artıq tutan “Tofiq Bəhramov”da avropalı rəqiblərinizi qəbul edirsiz.
- Fərqli atmosferdi. Avrokuboklarda oynadığımız zaman stadion dolu olur. Nəticələrimiz yaxşılaşdıqca, xüsusən də son bir neçə ildə populyarlığımız artır. Heç bir oyunçu evindən çıxa bilmir. Bizi nə qədər insanın izlədiyini təsəvvür edə bilməzsiz. Sonra daxili liqa başlayır və o qədər də maraq yoxdu. Liqada azarkeşlərin olması bizim üçün də vacib olardı. Onlar motivasiya və məsuliyyət hissi verirlər.

davamı olacaq

MÜZƏFFƏR QULUZADƏ