“Ayntraxt”dan “Qarabağ” üçün iki ciddi həmlə: bizimkilər isə vaxt itirir...

“Qarabağ”ın Çempionlar Liqası çərçivəsində Frankfurt “Ayntraxt”ına qarşı keçirəcəyi taleyüklü matça 16 gün qaldı. Bu ərəfədə həm “köhlən atlar”ın, həm də Almaniya təmsilçisinin heyətlə bağlı planlarına nəzər salmaq vacibdi.

“Football-plus.az” xəbər verir ki, “köhlən atlar”ın düşərgəsində sükut hökm sürür. Həm də təcrübəli hücumçu çatışmazlığı üzündən vacib xallar itirən Ağdam təmsilçisi hələ yeni transfer reallaşdırmayıb.

Qarşı tərəfə gəlincə, “qartallar” son günlərdə 2 hücumçu transferinə imza atıb. Bunlardan birincisi Yunus Ebnutalibdi. “Elversberq”dən alınan futbolçunun 22 yaşı var. O, bu mövsüm 2-ci bundesliqada meydana çıxdığı 17 matçda 12 qol vurub. Digər yeni oyunçu isə Ayub Amamuni-Eçquyabıdı. “Hoffenhaym”ı “Ayntraxt”a dəyişən 22 yaşlı futbolçu bu mövsüm forma geydiyi 18 qarşılaşmada 9 qol, 6 məhsuldar ötürmə müəllifi olub. “Ayntraxt” hər iki hücumçuyla 5 illik müqavilə imzalayıb.

Göründüyü kimi, “qartallar” qış fasiləsində hücum xəttinin gücləndirilməsinə nail ola bilib. Belədə “Qarabağ”ın hələ hücumçu almaması yaxşı əlamət deyil…

Xatırladaq ki, yanvarın 21-də Tofiq Bəhramov adına Respublika stadionunda keçiriləcək “Qarabağ” – “Ayntraxt” matçı saat 21.45-də başlayacaq.

KƏNAN BAHADIR