“Qarabağ”dan nə FCSB çəkinir, nə də “Ayntraxt”! – Qurban Qurbanovu tora salmayın!
Bu yaxınlarda “Qarabağ”ın FCSB ilə yoxlama oyunu keçirmək istədiyi, ancaq qarşı tərəfin bu təklifdən imtina etdiyi haqda xəbər yayıldı. Çox keçmədən Rumıniya təmsilçisinin meneceri Mihay Stoykanın mövqeyi ortaya çıxdı.
Onun dediklərini xatırlayaq:
“Qarabağ” bizdən onlarla oynamaq istəyib-istəmədiyimizi soruşdu. Lakin onlarla oynasaq, bu, əhval-ruhiyyəmizi aşağı sala bilər. “Qarabağ” yanvarın 12-də oynamaq istəyirdi, amma biz yanvarın 16-da “Beşiktaş”la oynayacağıq”.
Stoykanın açıqlaması ölkəmizdə birmənalı qarşılanmadı. Bəzi xəbər saytları bu sözləri xoşagəlməz başlıqlarla tirajladı. Ona eyham vurdular ki, FCSB “Qarabağ”la yoxlama matçında qarşılaşmaqdan qorxub. Elə xeyli azərbaycanlı futbolsevər də belə düşünür. Onlar sosial şəbəkələrdə yazdığı rəylərdə rumınları lağa qoyur, “Qarabağ” deyib sinəsinə döyür. Təbii ki, söhbət yoxlama görüşündən gedirsə, hansısa qorxudan danışmaq yersizdi. Görünür, həmvətənlərimiz yenə emosional düşüncənin, heç kimə lazım olmayan “güc partlayışı”nın ağuşuna düşüb.
Futboldan azca anlayışı olan hər kəs dərk edir ki, bütün komandalar sınaqçı-rəqibləri özü seçə, istənilən təklifi qəbul və ya rədd edə bilər. Elə FCSB da hansısa səbəbdən “Qarabağ”la oynamaq istəməyib. Lap tutaq ki, qorxdu. Bəs, biz niyə küyə gedirik? Axı “Qarabağ” ilin ilk rəsmi matçında ciddi sınaqla üz-üzədi: “köhlən atlar” yanvarın 21-də Çempionlar Liqasının liqa mərhələsinin 7-ci turu çərçivəsində Frankfurt “Ayntraxt”ını qəbul edəcək. Və yenə “Ayaks”la oyundan əvvəl yaranan atmosferlə üz-üzəyik. “Qarabağ” “şişirdilir”, gücü-qüvvəsi ön plana çıxarılır. Axı hər kəsə məlumdu ki, belədə “köhlən atlar”ın oyun planı pozula, futbolçular arxayınlığın qurbanı ola bilər. Axı “Ayaks”a qarşı matçda favorit göstərilən komandanın acınacaqlı məğlubiyyəti və buna səbəb olan məqamlar - ayrı-ayrı oyunçuların fərdi səhvləri, hətta baş məşqçi Qurban Qurbanovun yanlış seçimləri və daha nələr, nələr gözümüzün önündədi.
Bəli, “Ayntraxt”la matça hələ 17 gün qalıb. Gəlin, qalan vaxt ərzində “Qarabağ”ı tərifləməkdənsə, nə dərəcədə böyük məsuliyyət tələb edən sınaq qarşısında olduğunu xatırladaq. Çempionlar Liqasının pley-off mərhələsinə vəsiqə qazanmaq kimi tarixi şansı əldən vermək bahasına başa gələcək səhvlərə yol verməyək!
Bilək ki, “Qarabağ”dan nə FCSB çəkinir, nə də “Ayntraxt”. “Liverpul” isə heç çəkinmir. Qurban Qurbanovu da arxayınlaşdırmayın, komandasını da. Biz hələ çox çalışmalıyıq. Azı yanvarın 28-nə kimi...
KƏNAN BAHADIR
