Türkiyə kubokunda bu həftə qrup mərhələsinin ilk turuna yekun vuruldu. Məlum olduğu kimi, qrup oyunlarına ötən həftə start verilmişdi. Ötən həftə isə 7 oyun keçirildi.

"Football-plus.az xəbər verir ki, bir aydan çoxdu böhranda olan “Samsunspor”, nəhayət, 5 oyunluq məğlubiyyət və 8 oyunluq qələbəsiz seriyaya son qoydu. Samsun təmsilçisi “Eyüpspor”u yenərək qrupa qələbə ilə start vermiş oldu. Çətin dönəmdən keçən və Erol Bulutla yollarını ayıran “Antalyaspor” Konyadan əliboş dönməklə ardıcıl 3-cü rəsmi oyunda uduzdu. Avqustdan bəri evdə heç kimə uduzmayan “Kocaelispor” isə 1-ci liqa təmsilçisi “Ərzurumspor”la oyunda problem yaşamadı.

Turun ən böyük maraqla gözlənilən oyunu Kadıköydə keçirildi. İlin son İstanbul derbisində “Fənərbaxça” “Beşiktaş”ı qəbul etdi. Sərgən Yalçının komandası noyabrın əvvəllərində bu rəqibə qarşı evdəki çempionat derbisində 2 topluq üstünlüyü əldən verərək şok məğlubiyyət yaşadığından qisas hissi ilə alışıb-yanırdı. Özü də qonaqların əlinə qisas üçün yaxşı fürsət düşmüşdü. Çünki “Fənər” bu matçdan öncə müxtəlif səbəblər üzündən 13 futbolçudan məhrum olmuşdu.

Oyuna damğa vuran isim Vatslav Çernı oldu. O, 33-cü dəqiqədə Abrahamın ötürməsindən sonra işlək olmayan sağ ayağı ilə topu Tarık Çətinin ayaqları arasından tora göndərdi. “Fənər” bu qola hələ ilk yarıda cavab verdi. Fasilə ərəfəsində Abrahamın Mərt Müldürə qarşı kobudluğu hakimin monitora dəvət olunması və penalti təyin etməsi ilə nəticələndi. Asensio fürsəti qaçırmadı. “Qartal” ikinci hissəni üstün keçirdi. Bu matçda Edersonu əvəzləyən qapıçı Tarık Çətin bir neçə önəmli seyvə imza atdı. Hər şey bərabərliyə doğru gedərkən son anlarda yenə Çernı səhnəyə çoxdu.

Maraqlıdı ki, o, Oostervoldeni “bazara göndərəndən” sonra yenə topu Çətinin ayaqları arasından tora göndərdi. 28 yaşlı çexiyalı vingeri artıq “Fənər”in qənimi adlandırmaq olar. Çünki o, Kadıköydə ardıcıl ikinci dəfə “sarı-lacivərdlilər”lə oyunda dubl etdi!

Ötən mövsüm Çernı bunu Avropa Liqasında “Reyncers”in heyətində bacarmışdı. “Beşiktaş” Sərgən Yalçının rəhbərliyi altında “Fənər”ə qarşı keçirdiyi ikinci oyundan da qələbə ilə ayrıldı.

Komanda bu məşqçi ilə çempion olduğu 2020/21-də də Kadıköydən zəfərlə ayrılmışdı (4:3). “Beşiktaş” ölkə kuboku çərçivəsində prinsipial rəqibə qarşı keçirdiyi 23-cü oyunda 12-ci qələbəsini qazanaraq üstünlüyünü bir qədər də artırdı (6 heç-heçə, 5 məğlubiyyət). Bütün turnirləri nəzərə almaqla 16 oyunluq məğlubiyyətsiz seriyası qırılan “Fənər” Domeniko Tedeskonun dönəmində 21-ci rəsmi oyunda cəmi 2-ci dəfə uduzdu.

qrup mərhələsi, 1-ci tur
A qrupu
Qalatasaray – İstanbul BŞ 1:0 (Ahmed Kutucu, 22), Trabzonspor – Alanyaspor 0:1 (Güvən Yalçın, 17), Fatih Karagümrük – İstanbulspor 0:0, Boluspor – Fəthiyəspor 0:0.

B qrupu
Samsunspor – Eyüpspor 2:1
Muandilmaci, 10. Sonər Aydoğdu, 33 – Berke Baran, 90.
Samsunspor: Posiadala, Mendes, Borevkoviç, Van Drongelen, Tomasson (Dəniz Şəkər, 76), Makumbu (Eyup Değirmenci, 87), Holse (Muhammed Akyüz, 87), Sonər Aydoğdu, Tahsin Bülbül (Palut Yaldır, 61), Əmrə Kılınç (Sonər Gönül, 46), Muandilmaci.

Konyaspor – Antalyaspor 1:0 (Tunahan Taşçı, 21), İğdır – Aliağa Futbol 2:2 (Özdər Özcan, 38. Rotariu, 73 – Vəli Çətin, 37. Ahmet İlhan Özək, 90), Gənclərbirliyi – Bodrum 3:2 (Nyanq, 59; 69. Samed Onur, 67 – Adəm Türk, 19. Əli Habesoğlu, 51).

C qrupu
Fənərbaxça – Beşiktaş 1:2
Asensio, 43-p. – Çernı, 33. 90+1.
Fənərbaxça: Tarık Çətin, Mərt Müldür, Şkrinyar, Oostervolde, Ləvənt Mercan, Bartuğ Elmaz (Yiğit Efe Dəmir, 75), İsmayıl Yüksək, Şimanski, Asensio, Oğuz Aydın (Haydar Karataş, 85), Kərəm Aktürkoğlu (Alaəddin Əkici, 81).
Beşiktaş: Ərsin Destanoğlu, Gökhan Sazdağı, Calo, Əmirhan Topçu (Paulista, 85), Yurasek (Rıdvan Yılmaz, 72), Salih Uçan (Dəmir Ege Tıknaz, 85), Orkun Kökçü, Raşitsa, Çernı, Devrim Şahin (Kartal Yılmaz, 72), Abraham.

Çaykur Rizəspor – Qaziantep 5:2 (Xəlil Dərvişoğlu, 1; 20; 60-p.; 71. Əmrəcan Bulut, 64 – Soresku, 37. Semih Gülər, 90+1), Kocaelispor – Ərzurumspor 3:1 (Çurlinov, 18; 45. Nonge, 53 – Baiye, 88), Keçiörəngücü – Beyoğlu Yeni Çarşı SF 3:1 (Xəlil Ayan, 17. Əli Akman, 37. Ərkam Dəvəli, 80 – Əmrə Ərən, 59).