Türkiyə kubokunda 5-ci turun oyunlarına yekun vuruldu və 19 komanda adını qrup mərhələsinə yazdırdı.

Qrup mərhələsindən etibarən ötən mövsümü superliqada ilk “5-lik”də tamamlayan komandalar da mübarizəyə qoşulur. Dünən qrup mərhələsinin püşkü atıldı. Öncə qruplarla tanış olaq.

A qrupu: Trabzonspor, Alanyaspor, Çaykur Rizəspor, Ankaragücü, Fatih Karagümrük, İsgəndərunspor.
B qrupu: Fənərbaxça, Kasımpaşa, Qaziantep, Göztəpə, İstanbulspor, Ərzurumspor
C qrupu: Qalatasaray, İstanbul BŞ, Konyaspor, Eyüpspor, Çorum, Boluspor.
D qrupu: Beşiktaş, Sivasspor, Antalyaspor, Bodrum, Kocaelispor, Kırklarelispor.

Qeyd edək ki, qrup mərhələsinin formatı bir qədər fərqlidi. Komandalar püşkdən öncə üç “torba”ya bölünmüşdü. Hər qrupda hər “torba”dan 2 komanda yer alıb. Ona görə də hər komanda qrupda hər “torba”dan gələn bir kollektivlə qarşılaşacaq. Başqa sözlə desək, hər komanda qrupda yalnız 3 oyun keçirəcək. İlk iki pilləni tutanlar 1/4 finala yüksələcək. 1/4 və yarımfinalda qalib bir oyunlıa bəlli olacaq. Qrupda ilk oyunlar yanvarın 7-9-da keçiriləcək. Maraq üçün bildirək ki, “Qalatasaray” qrupda “İstanbul BŞ” (ev), “Boluspor” (səfər), “Konyaspor”la (e), “Fənərbaxça” “Kasımpaşa” (s), “Ərzurumspor” (e), “Qaziantep” ilə (s), “Beşiktaş” isə “Sivasspor” (s), “Kırklarelispor” (e) və “Antalyaspor”la (s) qarşılaşacaq. Təsadüfə bax ki, “Fənərbaxça” ilə “Kasımpaşa” eyni qrupa düşərək bir-birinə rəqib olub.

Bu komandalar, bilindiyi kimi, kubokun gəlirləri xərcləri qarşılamadığı üçün bu mövsüm bu turnirdə iştirakdan imtina etmək istəyirdi. Amma həftənin əvvəlində federasiya prezidenti İbrahim Hacıosmanoğlu hər iki klubun rəsmiləri ilə görüşərək onları qismən fikrindən daşındıra bilmişdi. Ona görə qismən ki, bu komandalar turnirə qatılmağa razılıq versələr də, meydana yalnız 19 yaşlı futbolçuları buraxacaqlar. Yeri gəlmişkən, “Kasımpaşa” 5-ci turda meydana əsasən 19 yaşlı futbolçularla çıxmasına baxmayaraq, səfərdə 1-ci liqa təmsilçisi “Gənclərbirliyi”ni minimal hesabla məğlub edərək qrup mərhələsinə vəsiqə qazandı. “Kasımpaşa”nın heyətində yalnız iki futbolçunun yaşı 19-dan artıq idi. Hətta 2009-cu (!) il təvəllüdlü Yaman Suakar əvvəldən sona qədər meydanda qaldı.

“Fənərbaxça”nın heç bir rəsmisinin püşkatmada iştirak etmədiyini də bildirək.