Türkiyə çempionatında 23-cü tura dünən keçirilən 4 oyunla yekun vuruldu.

"Football-plus.az" xəbər verir ki, ''Samsunspor'' ''İstanbulspor''la səfər oyunundan 1:1-lik bərabərliklə ayrıldı. Eyni hesab ''Kayserispor''la ''Antalyaspor''un duelində də qeydə alındı. Kayseri təmsilçisi Burak Yılmazın debüt matçında 1 xal qazanmaqla superliqada öz antirekord - 7 oyunluq məğlubiyyət seriyasına son qoydu. ''Antalyaspor'' isə Sərgən Yalçının başçılığı altında keçirdiyi 7-ci rəsmi oyunda da uduzmadı. ''Trabzonspor''da böhran davam edir. Son 2 turdan xalsız ayrılan bu komanda bu dəfə evdə ''Kasımpaşa''ya boyun əydi (2:3). Trabzon təmsilçisi Abdulla Avcının başçılığı altında ilk dəfə çempionatda ardıcıl 3 oyundan xalsız ayrılmış oldu. ''Fənərbaxça'' ilə amansız çempionluq mübarizəsi aparan ''Qalatasaray'' yenə ən sevimli hesabına (2:1) nail olaraq əzmkar qələbə qazandı. ''Qaziantep''i qəbul edən son çempion çox böyük üstünlüyə malik olmasına baxmayaraq 71-ci dəqiqəyə qədər hesabda geridə idi. Amma fasilədə meydana çıxan Zahanın 72-ci və Barış Alpər Yılmazın 89-cu dəqiqədə vurduğu qollar həlledici oldu. 5 zərbəsi dirəkdən dönən ''Qalatasaray'' topa 75,8 faiz nəzarət etdi və rəqibin cərimə meydançasında 65 dəfə topla oynadı. Son 10 ilə nəzər salsaq, hər iki göstərici klub üçün rekorddu! Ən əsası Okan Buruk növbəti rekordun müəllifi olaraq yenidən adını klubun şanlı tarixinə yazdırdı. Belə ki, İstanbul nəhənginin superliqada evdəki məğlubiyyətsiz seriyası 29 (27 qələbə, 2 heç-heçə), qələbə seriyası 15 oyuna çatdı. Okan Buruk Gündüz Kılıçın 1961-ci ildə müəyyənləşdirdiyi rekordu yeniləyərək klub tarixində çempionatda ardıcıl 15 qələbə qazanan ilk yerli məşqçi oldu! Maraq üçün bildirək ki, turnirin tarixində yerli məşqçilərdə rekord Mustafa Dənizliyə aiddi. Məşhur çalışdırıcı 2000/01 və 2001/02-də ''Fənərbaxça''nın başında evdə ardıcıl 23 oyunluq qələbə seriyası yaxalamışdı.

ƏLİ