''Yunion''un üzvündən etiraf - ''Fənərbaxça''ya qarşı oynamaq daha çətin idi''
''Yunion'' Çempionlar Liqasında səfərdə ''Qalatasaray''ı məğlub edərək böyük sürprizə imza atdı.
"Football-plus.az" xəbər verir ki, Belçika çempionunun baş məşqçisi David Hubert oyunsonrası mətbuat konfransında açıqlamalar verərək bunları dedi:
''Qalib gəldiyimiz üçün sevincliyəm. Oyunçularımın performansından məmnunam. Düzdü, ideal oynamadıq. Bəzi məqamlarda top bizdə olanda daha məntiqli hücumlar qura bilərdik. ''Qalatasaray''ın zəif nöqtələrindən daha yaxşı faydalana bilərdik. Bu səviyyələrdəki matçlarda fürsətləri qaçırmaq olmaz. 2-3-cü qolları vurmağımız daha yaxşı olardı. Ancaq hər şeyə rəğmən ''Qalatasaray''ın heyətdəki problemlərindən yararlana bildik. Sərt bir oyun keçirdik. Öz meydanında 33 oyundu uduzmayan komandanı məğlub etdik. Bu stadionda 3 xal qazanmaq asan məsələ deyil. Biz bunu bacardıq. Müdafiədə xüsusilə diqqətli olmağa çalışdıq. Stadionun yaratdığı təzyiqdən qurtulmaq üçün əlimizdən gələni etdik. Qulağım necədi? Çox da yaxşı eşitmirəm. Amma problem deyil. Evdə uşaqlarla məşq edərək özümü buna hazırlamışdım. Atmosfer həqiqətən də mükəmməl idi. Azarkeşi sayəsində ''Qalatasaray'' 12 yox, daha çox futbolçu ilə oynayır. Ancaq biz sona qədər oyun intizamından qopmadıq və qol buraxmadan 3 xal qazandıq''.
Bu arada ''Yunion''un üzvü Usseynu Nyanq da oyundan sonra verdiyi açıqlama ilə diqqət çəkib. Seneqallı vinger ''Fənərbaxça''ya qarşı oynamaq daha çətindi, yoxsa, ''Qalatasaray''a qarşı'' sualına ''məncə, ''Fənərbaxça''ya qarşı oynamaq daha çətin idi'' cavabını verib. ''Fənərbaxça'' ilə ''Yunion'' 2024-cü ildə Konfrans və Avropa Liqasında 3 dəfə qarşılaşmışdılar. İki oyunda ''sarı-lacivərdlilər'', bir oyunda belçikalılar üstün olmuşdu.
Digər xəbərlər
