''Qalatasaray'' Türkiyə çempionatının 13-cü turunda debütant ''Gənclərbirliyi''ni qəbul etdi.

"Football-plus.az" xəbər verir ki, ötən tur digər debütant ''Kocaelispor''a uduzan İstanbul nəhəngi yenə büdrəməyə yaxın oldu. Son çempion fasiləyə 0:1 geridə yollansa da, ikinci hissədə vəziyyəti lehinə dəyişə bildi. ''Cim-Bom'' yekunda 3:2 üstün olaraq 2 turluq qələbə həsrətinə son qoydu. Amma zədəlilər baxımından vəziyyət getdikcə pisləşir.

''Sarı-qırmızılar'' onsuz da bu matçda Viktor Osimhen, Yunus Akgün, İsmail Yakobs, Kaan Ayhan və Berkan Kutlunun xidmətindən yararlana bilmədilər. Üstəlik Ərən Elmalı da pul qoyuluşu ilə bağlı qalmaqal üzündən 45 günlük cəza alıb. Bütün bunlar azmış kimi komanda ''Gənclərbirliyi'' ilə qarşılaşmada daha 3 futbolçunu itirdi.

Mario Lemina ilə Uilfrid Sinqo hələ ilk yarıda zədələnərək əvəzləndi. Roland Şallai isə oyunun sonlarına yaxın qırmızı vərəqə alaraq cəzalı duruma düşdü. ''Qalatasaray''ı həftəiçi Çempionlar Liqasında ''Yunion'', superliqanın növbəti turunda isə ''Fənərbaxça'' ilə derbi gözləyir. Bu da o deməkdi ki, komanda prinsipial derbiyə çox ciddi itkilərlə çıxacaq.

Düzdü, Lemina oyundan sonra verdiyi açıqlamada vəziyyətinin qənaətbəxş olduğunu və ÇL matçında iştirak edəcəyini dedi. Amma Sinqodan pis xəbər gəlib. O hələ tibbi müayinədən keçməsə də, ilkin ehtimallara görə ən azı 1 aylığa sıradan çıxıb. Sinqo daha öncə ''Beşiktaş''la derbidə də zədə alaraq təxminən bir aylığa sıradan çıxmışdı.

Beləliklə, ''Fənər''lə derbi ərəfəsində müxtəlif səbəblər üzündən ''Qalatasaray''ın 8 futbolçusunun oynamama ehtimalı var!

Ən əsası komandanın əsas qol silahı Osimhenin də həmin matçda oynayıb-oynamayacağı böyük sual altındadı.