Bir qədər sonra, daha dəqiqi, Bakı vaxtı ilə saat 16.00-da Sürixdə önəmli püşkatma mərasimi başlayır.

Gələnilki dünya çempionatına vəsiqəyə iddiasını davam etdirən yığmalar üçün “yol xəritəsi çəkiləcək”. İddialılar arasında Türkiyə yığmasının da olması azərbaycanlı futbolsevərlər üçün xoş xəbərdi. Axı dünya çempionatında azarkeşlik etdiyin komanda olmayanda adam futbol bayramından tam həzz ala bilmir. Azərbaycanda başqa böyük yığmaların müəyyən sayda azarkeşi olsa da, “ay-ulduzlular”ı milyonlarla həmvətimiz dəstəkləyəcək.

Artıq bəllidi ki, Türkiyəyə bu 4 rəqibdən biri düşəcək: İsveç, Rumıniya, Şimali Makedoniya, Şimali İrlandiya. Montellanın komandasının yeganə yarımfinal oyununu evdə keçirəcəyini nəzərə alsaq, ən azı finalda oynamaq vacib və yerinə yetiriləsi vəzifədi.

Yeri gəlmişkən, FİFA-nın dünən açıqlanan son reytinqində Türkiyə 25-ci yerdə qərarlaşıb. Qardaş-qonşu ölkə mümkün rəqiblərin hamısında yuxarıdan-aşağı baxır: İsveç 43-cü, Rumıniya 47-ci, Şimali Makedoniya 65-ci, Şimali İrlandiya 69-cu yerdədi.

ORXAN