Tyerri Anri, Zlatan İbrahimovç, Harri Keyn, Didye Droqba, Serxio Aquero, Ueyn Runi, Luis Suares – bütün bu və başqa əfsanəvi hücumçuları nə birləşdirir? Hər biri çoxlu qol və uğurlar ilə zəngin olan möhtəşəm karyera keçirib və ya keçirməkdədi.

"Football-plus.az" xəbər verir ki, 25 yaşlı Erlinq Holann adı çəkilənlərin hər birini Çempionlar Liqasında qol sayına görə arxada qoyub. Norveçli ulduz hər oyunda rəqibləri orta hesabla 1-dən çox məyus etməklə artıq turnir tarixinin bombardirləri siyahısında ilk “10-luq”dadı.

Skandinaviyalı karyerası boyunca 330 qol vurub. Hətta Messi və Kriştiano Ronaldo belə onun yaşında daha aşağı göstəricilərə malik idi.

Baxmayaraq ki, hər biri artıq “Qızıl top” qazanmışdı. Belə görünür ki, bəzi azarkeşlər və ekspertlər bu məqamın fərqinə varmırlar ki, gözlərimiz önündə potensial cəhətdən bütün zamanların ən dahi forvardı parıldayır.

İş ondadı ki, Erlinqin komanda oyununda uzaq düşdüyünü, məhdud keyfiyyətlərə malik olduğunu əsas gətirənlər onun qəhrəmanlıqlarını dəyərsizləşdirməyə meyillənib. Yumşaq desək, hədsiz mübahisəli tezisdi. Sözsüz, Holannı qeyri-adi unuversal adlandırmaq çətindi, ancaq onun yardımçı funksiyalarını da inkar etmək olmaz. “Mançester Siti”dəki elə ilk mövsümündə Qvardiolanın hücumlarının quruculuğunda vacib rolu üzərinə götürdü, Edersonun və ya müdafiəçilərdən birinin ötürmələrini qarşılamaq üçün daim meydanın dərinliklərinə çəkildi.

Norveçli Mançester klubunda keçidiyi 160 oyunda 22 məhsuldar ötürmə verib – hər oyuna orta hesabla 0,14 ötürmə düşür. Aquero ilə Cakada bu göstərici 0,17-yə bərabər idi. Ancaq nə Serxio, nə də Edin heç vaxt “komanda yoldaşları ilə yetərincə yüksək səviyyədə anlaşmır” ittihamıyla üzləşmirdi. Və ya Holannın Pepin oyun sisteminə qətiyyən uyğun gəlməməsi ilə bağlı nə qədər oxumuş və eşitmişik... Guya o, möhtəşəm fərdi uğurlar fonunda komandaya ziyan vurur. Amma məhz onun gəlişi ilə tarixi və çoxdan arzulanan trebl gerçəkləşdi. Erlinq, ümumiyyətlə, bütün mümkün və hətta mümkünsüz görünən rekordları yenilədi – “Borussiya”ya qol vurmaqla üç müxtəlif komandanın heyətində ardıcıl 5 ÇL matçında fərqlənən ilk futbolçu oldu. Və bu da hücumçunun dahiliyini əsaslandıran daha bir dəlildi. Erlinq hər yerdə yaxşıdı. “Zaltsburq”da, Dortmundda, “Siti”də, İtaliyanın olduğu qrupun birincisi kimi dünya çempionatına yollanmaq ərəfəsində olan Norveç yığmasında. 2024/25 mövsümü guya Holannın karyerasındakı ən zəif dönəm sayılır. Bu yöndə dedi-qoduya ünlü hücumçu belə cavab verib: “O mövsüm doğrudan da zəifdisə, mən məsələnin belə qoyuluşu ilə razıyam”. Premyer-liqada 22, Çempionlar Liqasında 8 qol. Forvardların əksəri belə “zəif” mövsümə görə idman həyatını qurban verməyə hazırdı. Və ya 2025-in sentyabrı ilə bağlı daha bir gülməli statistik xəbər: Erlinq premyer-liqada ən pis startını gerçəkləşdirib. Həmin pis start isə ilk 4 turda 5 qoldan ibarətdi.

Skandinaviyalı nəhəng “Siti”ni korlamadı və onu özünə tabe etdirmədi. Əksinə, Qvardiola zamanla komandanı yenidən toparlamağa başladı. İndi Holann daha rahatdı. İspaniyalı mütəxəssis tez-tez topdan imtina edir – ÇL-də “Borussiya” ilə oyunda topa nəzarət 50-nin 50-yə nisbətində idi. Daha az mövqe hücumları norveçlinin geniş sahə qazanması deməkdi. Sıx mübarizə şəraitində özünə “dəhliz” tapa bilirdisə, indi qol vurmaq şansı daha da artıb. Təhlükəli vəziyyətləri qola çevirmək isə onun üçün heç vaxt problem olmayıb.

Çərşənbə günü dortmunduları necə lazımdı cəzalandırdılar. “Siti” hər şeydə üstün idi – toplu da, topsuz da. Ona görə ki, komanda özünün cari mövsümdəki tendensiyalarına dəqiq əməl etdi. MS-ni ikinci dəfə kapitan sarğısı ilə meydana çıxaran Erlinq “çərçivə”yə üç zərbə vurdu. Bir dəfə uğurlu driblinq etdi, bir həlledici ötürmə verdi, ötürmələrinin dəqiqlik faizi 81 oldu. Və Kobelin qapısından da top keçirdi. İdeal oyun necə olur ki?!

Holann həm fiziki, həm də mental baxımdan güclüdü. O, elit səviyyəli forvardlar üçün xarakterik olan bütün vacib keyfiyyətlərə malikdi. Sərhədsiz istedada və az qala heyvani qol duyumuna malik olan, qorxunc və möhtəşəm bitiricidi. Erlinqon heç də yaxşı olmadığı ilə bağlı mənasız düşüncələrə dalmağa dəyməz.

Və qoy “Siti” norveçlidən asılı olsun, bu da normal haldı. “Barselona” Messidə asılı idi, “Real” Ronaldodan, PSJ Mbappedən, “Bavariya” Levandovskidən. Hətta hansısa forvarddan asılı olan klubların da titullar qazanması tam realdı. Bu gerçəyi artıq zaman sübut edib. Holann dahidi. Bir gün karyerasını bitirəndə heç kim bununla bağlı mübahisə etməyəcək. Hələ ki dahiliyini vurğulamaqda fayda var. Elə onu dəyərsizləşdirməyi bitirməkdə də.