''Qalatasaray'' iki önəmli isimlə yeni müqavilə imzalayıb.

"Football-plus.az" xəbər verir ki, söhbət baş məşqçi Okan Buruk və əsas oyunçulardan biri olan Barış Alpər Yılmazdan gedir.

Prezident Dursun Özbək hələ oktyabrın 10-da bir tədbirdə jurnalistlərlə söhbət edərkən Burukun müqaviləsinin yeniləndiyini açıqlamışdı. Klub tərəfindən rəsmi olaraq bununla bağlı məlumat verilməsə də, yeni anlaşmanın detalları Türkiyə mətbuatına bəlli olub.

Oktyabrın 19-da 52 yaşı tamam olacaq mütəxəssisin əvvəlki müqaviləsi bu mövsümün sonunda başa çatırdı. Şayiələrə yer verməmək üçün bu məsələni tez yoluna qoymaq istəyən rəhbərlik təcrübəli məşqçi ilə ''1+2'' illik yeni müqavilə imzalayıb. Burukun illik maaşı isə 120 milyon lirədən 200 milyon lirəyə qaldırılıb ki, bu da təxminən 4 milyon avroya bərabərdi! Son 3 ildə qazandığı çempionluqlarla adını klub tarixinə yazdıran və saysız-hesabsız rekordları yeniləyən Buruk gözünü Fatih Terimin rekorduna dikib.

Türkiyə futbolunda ardıcıl 4 çempionluğu yalnız 1996-2000-ci illərdə Fatih Terimin ''Qalatasaray''ı yaxalayıb. Barış Alpərə gəlincə, onun 2028-ci ilə qədər nəzərdə tutulan əvvəlki müqaviləsinin müddəti yenilənməyib. Amma maaşı yenilənib və 100 milyon lirədən 150 milyon lirəyə yüksəldilib. Hətta bonuslarla birlikdə bu məbləğ 200 milyon lirəyə çatacaq.

Xatırladaq ki, Barış mövsümün əvvəlində İstanbul nəhəngindən ayrılmağa çox yaxın idi. Ona Səudiyyə Ərəbistanından 40 milyon avroluq təklif gəlmişdi. Amma rəhbərlik böyük çətinliklə də olsa, bu universal futbolçunu heyətdə saxlamağı bacarmışdı.