Bilindiyi kimi, Mahir Emrelinin “Kayzerslautern”dəki işləri yolunda deyil.

Həmvətənimiz Almaniyanın 2-ci bundesliqasında yeni mövsümdə keçirilən 6 matçdan yalnız ilk üçündə forma geyib. 4-cü turda zədəli olan hücumçu 5-6-cı turlarda tam sağlam olsa da, adı iştirak ərizəsinə salınmayıb.

Hadisə “qırmızı iblislər”in azarkeşlərinin də diqqətindən yayınmayıb. Onlar Mahirin üç gün əvvəl “instagram” hesabında paylaşdığı şəklin şərh bölməsində fikirlərini bölüşüblər. Bəziləri tənqid edib, bəziləri də motivasiya verib. “Football-plus.az” həmin rəylərdən seçmələri təqdim edir.

“insidebetze”: “Mahir, sənə inanırıq”.
“lebenslangfck”: “İrəli, Mahir! Səndən nə istədiyimizi bilirsən”
“thegreatmitsch”: “Çox çalışmaq həmişə bəhrə verir. Bacarıqlarını sərgilələyəcəyin vaxt gəlib çatacaq. Komandamızın bir parçasısan. Bəxtini sınamağa davam et”
“ch.ht.insta”: “Sosial mediada çox vaxt keçirmə! Özünü məşqlərdə göstər. Az danış, çox çalış!”
“lautern_1900_fan”: “Kayzerslautern”də təxribatlarla yox, qollarla gündəmə gəlməliydin. Eqonu kənara qoy. Heç kim komandadan daha önəmli deyil. Ya onun bir parçası ol, ya da ən qısa vaxtda klubu tərk et”.
“kevinmatthiasklein”: “Getdik, Mahir! Sürəti artır və “sol çəkic”ini işə sal. Sənə ehtiyacımız var”.
“tobi_kon83”: “Futbol komanda oyunudu. Orda şahzadə ola bilməzsən. Bu duruma ən uyğun cavab yalnız qolların ola bilər. Ancaq sən peşəkar davranmırsan. Bəli, mübahisələrin mərkəzində olmaq səni populyarlaşdıracaq, amma belə tanınmaq sənə baha başa gələ bilər”.
“michel.rau”: “Biz “Kayzerslautern”də işi ilə məşğul olan futbolçular görmək istəyirik, öz eqosuna komandadan daha çox dəyər verənləri yox”.
“insta.mohr91”: “Mahir “Nürnberq”də komandaya uyğunlaşmaq istəməyən, haqq etmədiyi dəyəri qazanan futbolçu idi. Nəticədə onu komandada istəmədilər. Deyəsən, o, hələ də bəzi davranışlarıyla azarkeşlərin əsəbləriylə oynadığını anlamayıb”.
“florian_lauer1983”: “Özünə gəl və hamının haqqında yanlış düşündüyünü sübut et”.

KƏNAN BAHADIR