"Qarabağ"ın Çempionlar Liqasının pley-off mərhələsindəki rəqibi olan "Ferentsvaroş" UEFA-nın qəzəbinə tuş gəlib.

"Football-plus.az"ın məlumatına görə, ali futbol qurumu Budapeşt təmsilçisini 30 min avro cərimələyib. Buna "yaşıl qartallar"ın ÇL-nin 3-cü təsnifat mərhələsinin "Ludoqorets"ə (Bolqarıstan) qarşı evdə keçirdiyi cavab matçında (3:0) azarkeşlərin rəqibə qarşı irqçi davranışlar sərgiləməsi və bolqar tərəfdarların müvafiq sektorda əyləşməsinə imkan verməməsi səbəb olub.

Həmçinin oyunun keçirildiyi "Ferentsvaroş Arena"da bütün bu hadisələrin cərəyan etdiyi B2 sektorundan istifadə ikiilliyə qadağan edilib.

Xatırladaq ki, macarlar avqustun 27-də "Tofiq Bəhramov"da "Qarabağ"ın qonağı olacaq. İlk oyunda "köhlən atlar" inamlı qələbə qazanıb (3:1).

KƏNAN BAHADIR