“Yuventus”la “Siti”nin dueli tək bu qrupun yox, bütövlükdə qrup mərhələsinin ən səbirsizliklə gözlənilən oyunlarından biri idi.

"Football-plus.az" xəbər verir ki, hər iki komanda son tura 6 xalla daxil olmuşdu. Amma “Yuve” daha çox qol vurduğundan “Siti” yalnız qələbə təqdirində qrup lideri ola biləcəkdi. Belədə Qvardiolanın komandası pley-offda “Real”la dueldən də qurtulacaqdı.

Qəribədi ki, belə önəmli oyunda turinlilərin çalışdırıcısı İqor Tudor heyətdə rotasiya etmək qərarına gəlmişdi. İlk iki turda əla performans sərgiləyən və komandanı arxasınca daşıyan Kənan Yıldız, Konseysao, Kolo Muani kimi futbolçuların heç biri start heyətində yox idi. Yəni “Yuve”nin darmadağın olmasının bir səbəbi də məhz budu. Dokyu erkən qolla hesabı açandan sonra futbolsevərlər iki kuryoz qol izlədi.

Əvvəlcə Ederson rəqibə qol bağışladısa, çox keçmədən Kalulu yanında rəqibin heç bir oyunçusu olmadığı halda topu öz qapısına göndərdi. Holannın da meydana çıxması ilə “Siti” 2-ci hissənin gedişində hesabı 5:1-ə çatdırdı. Vlahoviç sonda qollardan birinin əvəzini çıxsa da, “Yuve” darmadağından qurtula bilmədi. İngiltərə nəhəngi həm qrupu zirvədə tamamladı, həm də bu rəqibdən qisasını aldı. Ön mövsüm Çempionlar Liqasının əsas mərhələsində “qoca sinyora” güclü rəqibi evdə iki cavabsız qolla məğlub etmişdi.

Yeri gəlmişkən, Holann peşəkar karyerasında yubiley – 300-cü qolunu vurdu. Onun bu qədər qolu 370 oyuna sığdırdığını nəzərə alsaq, Holann hələlik Ronaldo, Messi və Mbappe kimi “əjdahaları” da qabaqlayır. Belə ki, 300-cü qolu Ronaldo 554-cü oyunda, Messi 418-ci oyunda, Mbappe isə 409-cu oyunda vurub. Qrupun formal xarakter daşıyan digər oyununda “Əl-Əyn” qalib gəlməyi bacardı. Halbuki mərakeşlilər favorit sayılırdı. Çox güman, növbəti KDÇ-yə qədər biz bir daha bu klubların adını eşitməyəcəyik...

G qrupu, 3-cü tur
Yuventus – Mançester Siti 2:5 (1:2)
Yuventus (Turin, İtaliya): Di Qreqorio, Kosta (Kambiaso, 57), Kalulu, Savona (Qatti, 60), Kelli, Kostiç, Lokatelli (K.Türam, 57), Makkenni (Aciç, 83), Qonsales, Koopmayners (Kənan Yıldız, 57), Vlahoviç.
Mançester Siti (İngiltərə): Ederson, Nunyeş, Diaş, Akanci, Ayt-Nuri (Şerki, 75), Rodri (İlkay Gündoğan, 66), Reynders, B.Silva (O'Rayli, 75), Savinyo, Dokyu (Foden, 66), Marmuş (Holann, 46).
Qollar: Dokyu, 9 (0:1). Koopmayners, 11 (1:1). Kalulu, 26-öz qapısına (1:2). Holann, 52 (1:3). Foden, 69 (1:4). Savinyo, 75 (1:5). Vlahoviç, 84 (2:5).
Vərəqə: Kalulu, 64 – sarı.
Hakim: Kleman Turpen (Fransa).
26 iyun. Orlando. 54320 tamaşaçı. 

Vidad – Əl-Əyn 1:2 (1:1)
Vidad (Kasablanka, Mərakeş): Benabid, Mufid, Oliveyra, Harkass (Meyers, 55), Buçeta, Mubarik (Benktib, 79), Zemraui (Mutaraci, 79), Amrabat, Lorç, Əl-Somah (Obenq, 62), Mailula (Mvalimu, 62).
Əl-Əyn (Əbu Dəbi, BƏƏ): Patrisio, Yasiç (Əl-Baluşi, 65), Traore, Rabia, Ben Xaleq, Zabala, Park, Kaku (Şadli, 65), Palasios (Nyanq, 90), S.Rahimi (H.Rahimi, 90), Laba (Nader, 87).
Qollar: Mailula, 4 (1:0). Laba, 45+1-p. (1:1). Kaku, 50 (1:2).
Vərəqələr: Palasios, 11. Traore, 45+2. Mvalimu, 68. Amrabat, 83. Benktib, 90+3 – sarı. 
Hakim: Dryu Fişer (Kanada). 
26 iyun. Vaşinqton. 10785 tamaşaçı. 

1. Mançester Siti 3 3 0 0 13-2 9
2. Yuventus 3 2 0 1 11-6 6
3. Əl-Əyn 3 1 0 2 2-12 3
4. Vidad 3 0 0 3 2-8 0