Bu qrupda ilk iki turdan sonra vəziyyət elə əvvəlcədən proqnozlaşdırıldığı kimidi.

"Football-plus.az" xəbər verir ki, “Yuventus”la “Mançester Siti” 2-ci turda da hesabına rahat qələbə yazdı. Kənan Yıldız hələ ki turnirin ən parlaq oyunçularından biridi. Türkiyə yığmasının üzvünün canfəşanlığı 6-cı dəqiqədə avtoqolla nəticələndisə, çox keçmədən Yıldız rəqibin köməyi olmadan fərqləndi.

“Vidad” gözlənilmədən qollardan birinin əvəzini çıxaraq bir müddət intriqanı bərpa etməyi bacardı. Amma 2-ci hissədə Kənan yenə səhnəyə çıxaraq “Yuve”ni rahatlatdı. 20 yaşlı futbolçu Turin nəhəngində ilk dəfə ardıcıl 3 rəsmi oyunda qol sevinci yaşadı. Yekun nəticəni isə penaltidən fərqlənən Vlahoviç müəyyənləşdirdi. Bütün turnirləri nəzərə almaqla “Yuve” son 4 oyunda artıq 14 qol vurub. Halbuki bu seriyadan öncə komanda eyni sayda qolu 14 oyuna vurmuşdu!

Qrupun digər matçında “Siti” “Əl-Əyn”ə rəhm etmədi. Qvardiolanın komandasının əlinə top fərqini yaxşılaşdırmaq üçün gözəl fürsət düşmüşdü. “Şəhərlilər” bu fürsətdən bacardıqları qədər yararlandılar. “Siti” hələ ilk yarıda 3 qol vuraraq 2-ci hissəni formallığa çevirdi. Cərimə zərbəsindən fərqlənən Eçeverri, eləcə də yekun nəticəni müəyyənləşdirən Şerki yeni klubda ilk dəfə qol sevinci yaşadı. Adı “Qalatasaray”la hallanan İlkay Gündoğan isə dubl etməklə özünü yaxşı tərəfdən göstərdi.

Maraqlıdı ki, Qvardiola məşqçi kimi KDÇ-də 10-cu oyundan 10-cu qələbə ilə ayrıldı. Bu turnirdə onun klubları 33 qol vurduqları halda, öz qapısından cəmi 2 qol buraxıb. Beləliklə, qrupun lideri 3-cü turda “Yuventus”la “Siti”nin duelindən sonra bəlli olacaq. “Yuve” daha çox qol vurduğu üçün əlavə göstəricilərdə üstündü. Yəni heç-heçə məhz Turin nəhənginə sərf edəcək. “Siti” qrupdan çıxmaq üçün yalnız qalib gəlməlidi.

Maraqlıdı ki, son illərdə ÇL-də dəfələrlə yolları kəsişən “Siti” ilə “Real” bu turnirdə də artıq 1/8 finalda üzləşə bilər. Çünki “Siti” qrupu zirvədə tamamlaya bilməsə, H qrupunun lideri ilə qarşılaşacaq. Bu isə böyük ehtimalla məhz “Real” olacaq...

G qrupu, 2-ci tur
Yuventus – Vidad 4:1 (2:1)
Yuventus (Turin, İtaliya): Di Qreqorio, Koşta (Niko İvan Qonsales, 72), Kalulu, Savona, Kelli, Kambiaso, Makkenni (Koopmayners, 46), K.Türam, Konseysao (Lokatelli, 72), K.Yıldız (Qatti, 84), Kolo Muani (Vlahoviç, 72).
Vidad (Kasablanka, Mərakeş): Benabid, Mufi (Əziz Ki, 87), Oliveyra, Butuil (Harkass, 78), Meyers (Mvalimu, 46), Mufid, Mubarik, Zemraui (Mailula, 78), Amrabat, Lorç, Obenq (Əl-Somah, 46).
Qollar: Butuil, 6-öz qapısına (1:0). K.Yıldız, 16 (2:0). Lorç, 25 (2:1). K.Yıldız, 69 (3:1). Vlahoviç, 90+4-p. (4:1).
Vərəqələr: Meyers, 22. Oliveyra, 51. K.Türam, 77 – sarı.
Hakim: Səid Martines (Honduras).
22 iyun. Filadelfiya. 31975 tamaşaçı.

Mançester Siti – Əl-Əyn 6:0 (3:0)
Mançester Siti (İngiltərə): Orteqa, Xusanov (Bobb, 61), Akanci, Qvardiol (Diaş, 74), Ait-Nuri, Niko İqlesias Qonsales (Rodri, 61), İlkay Gündoğan, B.Silva (Şerki, 73), Nunyeş, Eçeverri (Foden, 46), Holann.
Əl-Əyn (Əbu Dəbi, BƏƏ): Eysa, Yasiç, Nyanq, Park, Rabia, Zabala (Erik, 62), Traore, Nader (Palasios, 46), Şadli (Sanabriya, 74), Əl-Baluşi (Kaku, 62), Rahimi (Laba, 46).
Qollar: İ.Gündoğan, 8 (1:0). Eçeverri, 27 (2:0). Holann, 45+5 (3:0). İ.Gündoğan, 73 (4:0). Bobb, 84 (5:0). Şerki, 89 (5:0).
Vərəqələr: Zabala, 25. Rabia, 45+4. Xusanov, 58 – sarı.
Hakim: Mustafa Qorbal (Əlcəzair).
22 iyun. Atlanta. 40392 tamaşaçı.

1. Yuventus 2 2 0 0 9-1 6
2. Mançester Siti 2 2 0 0 8-0 6
3. Vidad 2 0 0 2 1-6 0
4. Əl-Əyn 2 0 0 2 0-11 0