Tarixində ilk dəfə avrokuboklara, daha dəqiqi, Konfrans Liqasına vəsiqə qazanan “Araz-Naxçıvan” yay fasiləsinə fəal başlayıb.

Bir neçə futbolçu ilə müqaviləni yeniləyən naxçıvanlıların srağagünkü qərarı təəccüb doğurdu. Belə ki, klub rəhbərliyi Vadim Abdullayevlə yolları ayırmağı lazım bildi. 30 yaşlı yarımmüdafiəçi ilə söhbətdə bu qərarın səbəblərini aydınlaşdırmağa çalışdıq.

Xatırladaq ki, Vadim 2022-nin yayından bu komandanın formasını geyirdi.

- “Araz-Naxçıvan”ın Konfrans Liqasına vəsiqə qazanmasında əsas rol kimə məxsusdu – baş məşqçiyə, yoxsa futbolçulara?
– Burda tək bir tərəfin adını çəkmək düzgün olmaz. Sürücüdən tutmuş futbolçulara, məşqçilərdən klub işçilərinə qədər hər kəsin əməyi var. Azarkeşlərin də öz rolu oldu. Komanda tarixə düşdü və mən də bu tarixin bir parçası olduğuma görə qürurluyam.

- Bu heyətlə Konfrans Liqasında bir mərhələ keçmək mümkün olacaqmı?
- Heyəti necə quracaqlarını bilmirəm. Orda yerli futbolçular və məşqçi heyəti varsa, onlarla hara istəsələr, getmək olar. Mənim üçün hər birinin dəyəri ayrıdı. Hər şeyin yaxşısına layiqdilər.

- Komandanın bu yerlərə gəlib çatmasında öz rolunu necə qiymətləndirirsən?
- Əziyyətimi futbol ictimaiyyəti, məşqçi heyəti və futbolçular gördü. Özüm haqda danışmaqdan həmişə çəkinmişəm. Meydanda da, paltardəyişmə otağında da komandaya hər şeyimi verdim. Oyunlarım göz qabağındadı. Bu komandanın kapitanı olmuşam, millidə oynamışam. “Araz-Naxçıvan”ı milli səviyyədə təmsil edən ilk futbolçu olmuşam, bəlkə də yeganə. Amma görünür, bu da bəs etmədi. Komandada məndən çox oyun keçirən futbolçu yoxdu. Qismət belə imiş.

- Bir çox futbolçularla müqavilə müddəti uzadıldığı halda, sənlə anlaşılmaması nə ilə bağlı idi?
- Açığı, klub rəhbərliyi məni komandada görmək istəmədi. Gördüyüm işlər onları qane etməyibsə, orda qalmağın da mənası yox idi. 

- Baş məşqçi və ya klub rəhbərliyi ilə şəxsi münasibətlər bu qərarda rol oynadı, yoxsa maliyyə şərtlərində anlaşmazlıq var idi?
- Heç kimlə şəxsi problemim olmayıb, həmişə mənə hörmətlə yanaşıblar. Məşqçi ilə də halallaşdım. Sadəcə, klubun fikri bu yöndə olub. 

- Səncə, bu qərar baş məşqçidən gəldi, yoxsa klub rəhbərliyindən?
- Klubun qərarıdı və mən həmişə belə qərarlara hörmətlə yanaşmışam. Çətindi, amma bu səhifə bağlandı. “Araz-Naxçıvan”a uğurlar arzulayıram. Ordakı məşqçilərə, futbolçulara, klub işçilərinə hörmətim sonsuzdu. Əziyyət çəkən hər kəsə təşəkkür edirəm. Artıq bu komanda ilə hekayəm başa çatdı.

- Karyeranın sonrakı mərhələsini necə planlaşdırırsan? Premyer-liqa klublarından təklif gözləyirsənmi?
- Hələlik heç bir klublarla danışıq aparmamışam, gələcəyimlə bağlı konkret nəsə yoxdu.

ƏSƏD SEYİDOV