Avropada futbol mövsümünün sonluğu həm də “Qızıl buts” uğrunda maraqlı mübarizəyə səhnə oldu.
"Football-plus az" xəbər verir ki, Viktor Dyokereş hər nə qədər “Sportinq”də əla mövsüm keçirsə də, bu mükafatı qazana bilmədi.

İsveçli forvard Portuqaliya çempionatının son 3 turunda hesabına yalnız 1 qol yaza bildi və və mövsümü 39 qolla tamamladı. “İkinci eşelon” ölkələrində, məlum olduğu kimi, “Qızıl buts”un hesablanması zamanı bir qol 1,5 əmsala, “böyük beşlik”də isə 2 əmsala vurulur. Ona görə də Dyokereş mövsümü yalnız 58,5 xalla tamamladı.

“Real”ın ünlü forvardı Kilian Mbappe isə məhsuldar oyununu son turda - “Real Sosyedad”la qarşılaşmada da davam etdirərək dubl etdi. O, La Liqada qollarının sayını 31-ə, xalını isə uyğun olaraq 62-yə yüksəltdi. Mbappeni real olaraq yaxalamaq fürsəti yalnız Məhəmməd Salahda idi. Premyer-liqanın son turundan öncə hesabında 28 qol olan misirli ulduz “Kristal Pelas”a qarşı het-trik edəcəyi təqdirdə mükafatı Mbappe ilə bölüşəcəkdi. Amma son oyunlarda məhsuldarlığı aşağı düşən Salah bu dəfə hesabına yalnız 1 qol yaza bildi və mövsümü 29 qolla, yəni 58 xalla tamamladı.

Nəzəri cəhətdən bazar günü axşam saatlarında “Barselona”lı Robert Levandovski ilə “Atalanta”lı Mateo Reteqi da liderə çata bilərdi. Amma bunun üçün onlar 6 qol vurmalıydılar. Təbii ki, möcüzə baş vermədi. Reteqi, ümumiyyətlə, fərqlənə bilmədisə, Leva “Atletik”ə yalnız iki qol vura bildi.

Beləliklə, Mbappe 2024/25-də “Qızıl buts” mükafatının sahibi oldu. Fransalı ulduz karyerasında ilk dəfə bu mükafata sahib çıxdı. Halbuki o, 2018/19-da PSJ-nin heyətində Liqa-1-də indikindən çox – 33 qol vurmuşdu. Amma həmin illərdə hələ Leo Messi fırtınası əsirdi. Argentinalı o mövsümdə La Liqanı 36 qolla tamamlamışdı.

Onu da bildirək ki, ardıcıl 24-cü mövsümdə “Qızıl buts” “böyük beşlik”də çıxış edən futbolçuya qismət oldu. Sonuncu dəfə “böyük beşlik”də oynamayan futbolçunun bu mükafatı qazanması faktına 2001/02-də rast gəlinib. Həmin vaxt Mario Jardel “Sportinq”in heyətində Portuqaliya çempionatında 42 qol vumuşdu. Sonda bu mövsüm “Qızıl buts” uğrunda mübarizədə ilk “10-luğ”u sizə təqdim edirik.

1. Kilian Mbappe (Real, Fransa) – 31 (62 xal).
2. Viktor Dyokereş (Sportinq, İsveç) – 39 (58,5)
3. Məhəmməd Salah (Liverpul, Misir) – 29 (58)
4. Robert Levandovski (Barselona, Polşa) – 27 (54)
5. Harri Keyn (Bavariya/İngiltərə) – 26 (52)
6. Mateo Reteqi (Atalanta/İtaliya) – 25 (50)
7. Aleksander İsak (Nyukasl, İsveç) – 23 (46)
8-9. Erlinq Holann (Mançester Siti/Norveç) – 22 (44)
8-9. Omar Marmuş (Mançester Siti/Misir) – 22 (44)
10. Mika Biret (Şturm, Monako/Danimarka) – 24 (42,5)