"Football-plus.az" millimizin baş məşqçisi Fernando Santuşun mətbuat konfransını təqdim edir.

- Latviya və Macarıstana qarşı oyunlardan gözləntiləriniz necədi?
- Məqsədimiz, həmişə olduğu kimi, yaxşı məşq prosesi keçmək və rəqiblərə qalib gəlməkdi.

- Yığmaya dəvət etmək istəsəz də, tərəddüd etdiyiniz və ya hansısa səbəbdən çağıra bilmədiyiniz futbolçu oldu?
- Əlbəttə. Bəzi oyunçular zədəli olduqları üçün millidən kənarda qaldı. Bunlar Coşqun Diniyev, Anton Krivotsyuk, Mustafaza Əhmədzadə, Amin Seydiyev və Aleksey İsayevdi. Əvvəli toplanışda Ramil Şeydayev və Ozancan Kökcü də iştirak etmişdi. Ancaq son vaxtlar klublarında mütəmadi oynamadıqları üçün bu dəfə onları dəvət etmədik. Yenə komandalarında aparıcı oyunçular sırasına düşsələr, çağıracağıq. Mütəmadi meydana çıxmayan futbolçular milliyə də dəvət olunmayacaq. Millinin qapısı hamıya açıqdı.

- Mətbuatda yayılan xəbərlərə inansaq, Latviya və Macarıstana uduzacağınız təqdirdə istefaya göndərilə bilərsiz...
- Söz-söhbətlər haqda danışmaq istəmirəm. Bu məsələ haqda nə deyə bilərəm? Qərarı AFFA rəhbərliyi verir. Onlardan asılıdı.

- Təyinatınızdan sonra komandada nələri inkişaf etdirmisiz? Düzü, nəticələr ortadadı. Ancaq oyun baxımından da hansısa irəliləyiş hiss olunmur.
- Biz uzun yola çıxmışıq. Layihə uzun müddəti əhatə edir. İndiyə qədər xeyli oyunçu milliyə çağrılıb, bizimlə tanış olub. Davam etməliyik. Bu yolun sonunda uğurlu olacağımıza inanıram.

- Premyer-liqada mövsüm başa çatır. Çempionatımıza 10 ballıq şkala üzrə hansı qiyməti verərdiz?
- "Qarabağ"ın gücü, iddiası hamıya bəllidi. Bu komandanın hansı səviyyədə çıxış etdiyini bilirik. Ancaq premyer-liqaya 5 bal verərdim. Bəli, bütün kollektivlərin baş məşqçiləri istəkli görünür və müəyyən hədəflər uğrunda mübarizə aparır. Ancaq yalnız 3-4 komandanpn hədəfi yuxarı pillələrdə qərarlaşmaqdı.

- Vüsal İsgəndərli yenə millidən kənarda qaldı. Bunun səbəbi nədi?
- Heyətə 25 futbolçu dəvət edə bilərik. 55 oyunçu çağırası deyilik ki... Vüsalı izləmişik. Klubunda bəzən sağ cinah müdafiəçisi kimi çıxış edir (onun əsas ampluası yarımmüdafiəçidi - red.)

- Dediz ki, klubunda mütəmadi şans qazanmayan oyunçular milliyə çağırılmayacaq. Onda növbəti mövsümdən bu məsələni necə tənzimləyəcəksiz? Nəzərə alaq ki, legioner limiti ləğv olunub. Belədə məcburiyyət qarşısında qalıb formada olmayan futbolçuları çağıracaqsız?
- Hər matçda 5-10 dəqiqə oynamaqla iştirak ərizəsindən kənarda qalmaq, mövsümü ehtiyat oyunçular skamyasınsa keçirmək fərqli anlayışlardı. Hərənin öz klubu var. Baş məşqçilərin qərarına hörmətlə yanaşmalıyıq. Milliyə dəvət olunan futbolçunun oyun təcrübəsi olmalıdı. Başqa ölkələrdə çıxış edən azərbaycanlı futbolçuların sayı azdı. Sözümün üstündəyəm. Milliyə dəvət olunan futbolçular mütəmadi olaraq, şans qazanmalıdı. Növbəti mövsüm haqda sonra danışarıq. Əlbəttə, mən də yerli oyunçuların daha çox meydana çıxmasının tərəfdarıyam. Unutmayaq ki, premyer-liqada komanda sayı artırılıb.

- Milli üzvləri mövsüm başa çatdıqdan sonra istirahət edə bilməyəcək. Onları hansı yolla oyunlara kökləməyi düşünürsüz?
- Ümid edirəm ki, motivasiya məsələsində hansısa çətinliyimiz olmayacaq. Toplanış mayın 27-də start götürəcək. Cədvələ əsasən, gün ərzində yalnız bir məşq keçəcəyik. Belədə oyunçuların ailəsiylə vaxt keçirməyə zamanı olacaq. Ölkə kubokunun final matçında çıxış edəcək futbolçulara isə üç gün istirahət veriləcək. Ailələriylə zaman keçirdikdən sonra düşərgəyə qoşulacaqlar. Hər halda, milli ruhun varsa, komandanı sevirsənsə, motivasiyan həmişə yerində olacaq. Əvvəl çalışdığım yerlərdə futbolçular milliyə motivasiyalı gəlib. Həmişə belə olub. Azərbaycanlıları da tanıyıram və güvənirəm. İnanıram ki, onlar millidən dəvət alanda çox sevinirlər.

- Bəs, optimal heyəti nə vaxt formalaşdıracaqsız? Sizə nə qədər zaman lazımdl?
- Milliyə 25 oyunçu dəvət edirik. Fikir verirsizsə, əksəriyyəti eyni oyunçulardı. Xatırlayın, mən Millətlər Liqasının qalibi olmuşam.

- Sizə güvənirik, bu öz yerində. Ancaq nəticə yoxdu axı...
- Yoldaşlıq görüşlərinin məqsədi oyunçuları sınaqdan keçirməkdi. Toplanışlara yeni futbolçular da cəlb olunmalıdı. Onlar da millinin ab-havasını duymalıdılar. Amma yekun qərar gələcəkdə veriləcək. Hər birinin millidə oynaya bilib-bilməyəcəyini görəcəyik. Bu proses Yunanıstan və Portuqaliyada da həyata keçirilib. Fikir verin, bu gün Portuqaliya millisində çıxış edən təcrübəli futbolçuların çoxunu o vaxt 18-19 yaşları olanda milliyə mən çağırmışam. Yunanıstanda da durum bu cürdü.

- Şahruddin Məhəmmədəliyev "Qarabağ"da demək olar ki, şan qazanmır. Amma hər dəfə onu milliyə çağırırsız. Azərbaycanda gənc qapıçı yoxdu ki, indidən "çərçivə"ni ona əmanət edəsiz?
- Məlumdu ki, qapıçının yeri başqadı. O, ən özünəməxsus işlə məşğuldu. Bu mövqedə rotasiya edirik. Xatırlayırsızsa, sonuncu toplanışda Şahruddid zədələndiyinə görə, Əlirza Müştəbazadəni çağırdıq. Rza Cəfərov da var. O, perspektivli qapıçıdı. Ancaq Şahruddinin təcrübəsi böyükdü və gənclərə yardım edə biləcəyinə inanıram.

KƏNAN BAHADIR