AÇ-2024-ün seçmə mərhələsi çərçivəsində noyabrın 16-da Tofiq Bəhramov adına Respublika stadionunda İsveç, 19-da isə səfərdə Belçika yığması ilə qarşılaşacaq Azərbaycan milli komandasının heyəti açıqlanıb.

Canni de Byazi aşağıdakı futbolçuların xidmətindən istifadə etməyi qərarlaşdırıb: qapıçılar - Şahrudin Məhəmmədəliyev (Adana Dəmirspor, Türkiyə), Yusif İmanov (Sabah), Rəşad Əzizli (Qəbələ); müdafiəçilər - Amin Seydiyev (Sabah), Rahil Məmmədov, Elvin Cəfərquliyev, Bəhlul Mustafazadə (hamısı "Qarabağ"), Anton Krivotsyuk (Daejon Hana, Koreya), Cəlal Hüseynov (Arda, Bolqarıstan), Höccət Haqverdi (Neftçi), Turan Manafov (Araz-Naxçıvan); yarımmüdafiəçilər - Coşqun Diniyev (Ümraniyəspor, Türkiyə), Eddi İsrafilov, Emin Mahmudov (hər ikisi “Neftçi”), Elvin Camalov, Aleksey İsayev (hər ikisi "Sabah"), Emil Səfərov (Qəbələ), Nəriman Axundzadə, Toral Bayramov (hər ikisi "Qarabağ"), Ozan Can Kökçü ("Eyndhoven", Niderland), Qismət Alıyev, Rüstəm Əhmədzadə (hər ikisi "Zirə"), Səbuhi Abdullazadə (Sumqayıt); hücumçular - Mahir Emreli (Dinamo, Zaqreb, Xorvatiya), Musa Qurbanlı (Yurqorden, İsveç), Ramil Şeydayev, (Buriram Yunayted, Tayland), Renat Dadaşov (Hatayspor, Türkiyə).

Yığma İsveçlə matçın hazırlığına dünən başlayıb. Baş məşqçi Canni de Byazi əvvəl olduğu kimi, komandanı Mərdəkanda - milli komandaların təlim-məşq mərkəzində bir araya gətirib. Yığma günortadan sonra bir araya gəlib və "Dalğa Arena"dakı ilk məşqdə tam heyət olmayıb. Çünki legionerlərdən Şahruddin Məhəmmədəliyev, Mahir Emreli, Musa Qurbanlı və Ramil Şeydayev bu gün millinin düşərgəsinə qoşulacaq. Ölkədən kənarda çıxış edən digər milli üzvlərindən Renat Dadaşov, Coşqun Diniyev, Cəlal Hüseynov, Anton Krivotsyuk, Ozan Can Gökçü isə artıq Bakıdadı.

Yarımmüdafiəçilər Aleksey İsayevlə Emil Səfərov zədəli olduqlarına görə çempionatın son turunda meydana çıxmayıb. “Qəbələ”nin üzvü son 3 matçda komandasına kömək edə bilməyib. İlkin məlumata görə, onların zədələri qarşıdakı matçların, heç olmasa, birində oynamağa imkan verir. Amma təbii kİ, hər ikisi milliyə gələrək hərtrəfəli müayinə olunacaq. Zədələri ciddi olarsa, futbolçular heyətdən kənarda qalacaq.

İtaliyalı mütəxəssis yığmaya iki yeni sima dəvət edib. Söhbət Səbuhi Abdullazadə ilə Turan Manafovdan gedir. Hər iki futbolçu bu mövsüm sabit oyun nümayiş etdirir. “Sumqayıt”ın üzvü 13 matçda meydana çıxıb, 1 qol vurub, 1 məhsuldar ötürmə verib. Sol cinah müdafiəçisi Turan Manafov da “Araz-Naxçıvan”a güc qatan futbolçulardandı. 25 yaşlı oyunçu bu mövsüm 13 matçda meydana çıxıb, 2 qol vurmağı bacarıb. De Byazi onları milliyə çağırmaqla çempionat matçlarını izlədiyini anlatmaq istəyir. Həm də bu futbolçular çempionatdakı çıxışı ilə yığmaya layiq olduqlarını isbat ediblər.

De Byazi Estoniya və Avstriya ilə matçlardan fərqli 4 futbolçunu yığmaya çağırmayıb. Bunlar “Səbail”in üzvləri Səlahət Ağayevlə Yusif Nəbiyev, Türkiyə “Tuzlaspor”unun müdafiəçisi Bəxtiyar Həsənalızadə və “Neftçi”nin yarımmüdafiəçisi Filip Ozobiçdi. İkinci dövrədə “dənizçilər” o qədər də yaxşı performans sərgiləmir. Yəqin De Byazi bunu nəzərə alaraq Şahin Diniyevin komandasından kimisə yığmaya dəvət etməyib. Bu səbəbdən də “Sabah”dan Yusif İmanov qolkiper, “Araz-Naxçıvan”dan Turan Manafov sol cinah müdafiəçisi kimi yığmaya dəvət olunub. Maraqlı məqam Bəxtiyar Həsənalızadənin milliyə çağrılmamasıdı. Müdafiəçi TFF 1-ci liqada komandasının əsas üzvlərindən sayılır. Lakin De Byazi onu bu dəfə siyahıya salmayıb. Görünür, Bəhlul Mustafazadənin geridönüşü və Cəlal Hüseynovun “Arda”da daha yaxşı performans sərgiləməsi italiyalını bu addımı atmağa məcbur edib. “Nefçti”nin üzvü Filip Ozobiçin yığmadan kənarda qalması anlaşılandı. Yarımmüdafiəçi flaqmanın heyətində o qədər də yaxşı təsir bağışlamır. De Byazi də bunun fərqində olduğu üçün onun yerinə daha gənc Səbuhi Abdullazadəni yığmaya dəvət edib. Lakin “Neftçi”dən Rəhman Hacıyevin milliyə dəvət olunmaması düşündürücü məqamdı. Yarımmüdafiəçi əsas heyət üzvü olmasa da, son oyunlarda flaqmanın xilaskarına çevirilib.

İLKİN SULTANLI