''Beşiktaş'' prezidenti Kriştiano Ronaldonun transferi haqda nə dedi?
[b][/b]Ötən gün Türkiyə və Avropa mətbuatında Kriştiano Ronaldo ilə bağlı sensasiyalı bir xəbər yayılmışdı.
Guya Səudiyyə Ərəbistanından ayrılmaq istəyən portuqaliyalı superulduza maraq göstərən 5 klubdan biri ''Beşiktaş'' idi. Türkiyə mətbuatında bununla bağlı dərc olunan xəbərlərdə Rəhmi Koçun bu transfer üçün kluba ciddi maddi dəstək verəcəyi qeyd olunmuşdu. Türkiyənin önəmli və nüfuzlu iş adamlarından olan Rəhmi Koç ''Fənərbaxça'' prezidenti Əli Koçun atası olsa da, uzun illərdi, ''Beşiktaş''ın rəsmi üzvüdü. O, onilliklərdi, ''Beşiktaş'' azarkeşi kimi tanınır. Amma ''ağ-qaralar''ın prezidenti Sərdal Adalı bu mövzuda suala istehza ilə yanaşaraq şayiələri təkzib edib.
''TRT Spor''un əməkdaşı Ərgin Aslan Adalı ilə bu barədə olan söhbətini ictimaiyyətə açıqlayıb. O, paylaşımında Sərdal Adalının bu sözləri dilinə gətirdiyini vurğulayıb:
''Stadionumuzda dənizə baxan qapının altında neft yataqları tapmışam. Ordan əldə edəcəyim pulla tək Ronaldonu yox, Messini də transfer edəcəm. Bizim strategiyamız ilk gündən bəllidi. Bu strategiyada dəyişiklik etmək niyyətimiz yoxdu. Belə şeyləri gündəmə gətirənlərin məqsədi nədi? Onların bu cür ulduzların karyeralarının sonunda nə qədər pul qazandıqlarından xəbərləri varmı?''
Digər xəbərlər
