AFFA İntizam Komitəsi "Neftçi" İK-də çıxış edən millimizin sabiq futzalçısı Namiq Məmmədkərimovu 4 oyunluq cəzalandırıb.

"Football-plus.az" milli assosiasiyanın rəsmi saytına istinadən xəbər verir ki, buna oyunçunun yüksək liqanın 16-cı turunda, "Şuşa" ilə matçda təcavüzkar davranış səbəbindən birbaşa qırmızı vərəqə alması səbəb olub.

"Ağ-qaralar"ın digər üzvü Emil Həsənzadə də eyni səbəbdən birbaşa qırmızı vərəqə alıb və 4 matç komandasına kömək edə bilməyəcək.

"Baku Fire"dan Elvin Quliyev "Araz-Naxçıvan"la qarşılaşmada söz və hərəkətlə etiraz səbəbindən ikinci sarı vərəqəni görüb və 1 oyunluq cəza alıb. O, meydançadan qovulandan sonra oyunun bərpasına mane olduğuna və görüş bitdikdə hakimləri təhqir etdiyinə görə 4 matçlıq da cəza alıb.