“Qurban Qurbanovun "Qarabağ"a gəlişinin şahidi olan biri kimi deyə bilərəm ki...”
"Qarabağ" yenə, dəqiq desək, 12-ci dəfə ölkə çempionu olmaqla azarkeşlərinə sevinc və qürur bəxş etdi.
Ağdam təmsilçisinin səviyyəsi hər kəsə bəllidi, burda təəccüblənəcək nəsə yoxdu. Əksinə, bu dəfə "köhlən atlar" ötən ilə nisbətən bir qədər yubandı. Daha doğrusu, "Zirə"nin qış fasiləsindən sonra sürət yığması, uğurlu nəticələr göstərməsi, hətta evdə keçirilən 21-ci tur matçında "Qarabağ"ı məğlub etməsi (3:2) ağdamlıların 32-ci tura qədər gözləməsinə səbəb oldu. Nəhayət, Qurban Qurbanovun komandası srağagün Masazırda "Sabah"la heç-heçə etməklə (1:1) məqsədinə çatdı. Beləliklə, ötən mövsüm 28-ci turda "Zirə"ni 26 xal qabaqlayaraq qızıl medallara yiyələnən "köhlən atlar" təkcə tarixində 12-ci dəfə yox, həm də ardıcıl 4-cü dəfə ölkənin ən güclüsü olduğunu sübut etdi. Bu dəfə "qartallar"la aradakı xal fərqi cəmi 13-dü. Hər halda, yenə "Qarabağ"a heç kim mane ola bilmədi. Niyə? Əsas məsələ elə bu sualın cavabında gizlənib.
Yuxarıdakı statistikadan da göründüyü kimi, "köhlən atlar" bu dəfə ötən ilə nisbətən zəif təsir bağışlayıb. Təbii ki, "Zirə"nin cari "futbol ili"ndə özünü daha yaxşı tərəfdən göstərdiyini bilirik. Lakin çempionat bu iki klubdan ibarət deyil. Ümumiyyətlə, Qurban Qurbanovun komandası bu mövsüm həm premyer-liqada, həm də ölkə kubokunda keçirdiyi oyunlar zamanı tərəfdarlarına narahatlıq yaşadıb. Amma "Qarabağ" eniş yaşayanda belə ölkəmizdə ciddi müqavimətlə üzləşmir. Üzləşə bilmir. Ağdam təmsilçisi rəqiblərindən o qədər yüksəkdədi ki...
Klubun baş sponsoru "Azərsun Holdinq"in ciddi maliyyə dəstəyi fonunda Tahir Gözəlin araya-ərsəyə gətirdiyi idarəçilik sistemi, 2008-ci ildən bəri baş məşqçi Qurban Qurbanova göstərilən hədsiz etimad və bunun özünü doğrultması uğurları, sadəcə, qaçılmaz edir. Həmçinin klub çətin vəziyyətlərdən çıxış yolu tapmaq bacarığına malikdi. Bunu qış "transfer pəncərəsi"ndə Juninyoyla yolların ayrılmasından sonra da gördük. Azərbaycana qısa müddətdə uyğunlaşacaq, məhsuldarlığını ortaya qoyacaq futbolçu lazım idi ki, "köhlən atlar" Kadi Borgesi qaytarmaqla “hədəfi vurdu". Braziliyalı yarımmüdafiəçi fevralın 11-dən bəri meydana çıxdığı 11 premyer-liqa matçında 5 qol, 5 məhsuldar ötürmə ilə kollektivin aparıcı üzvləri sırasındadı. Amma təbii ki, "Qarabağ"ın ən məhsuldar oyunçusundan danışmalıyıqsa, Kadini yox, Leandro Andradeni yada salmalıyıq. O, 32 matçda 14 qol vurmaqla nəinki ağdamlıların, ümumiyyətlə, çempionatın bombardiridi. Hələ 9 məhsuldar ötürmə müəllifi olduğunu demirik. Əlbəttə, "Qarabağ"ı uğurlara cəmi iki futbolçu daşımır. Nəriman Axundzadə, Aleksey Kaşuk, Yassin Benzya və Abdulla Zubir kimi oyunçular "köhlən atlar"ın sözün əsl mənasında vuran ayağıdı. Bu üzdən Qurban Qurbanovun kollektivin onurğa sütununu dağıtmaq istəməməsini anlayışla qarşılamalıyıq. Bu siyahıya qapıçılarla müdafiə xəttini təşkil edən təcübəli və bacarıqlı futbolçuların adlarını da əlavə edəndə ortaya qarşısıalınmaz güc çıxır. Axı avrokuboklarda çox ciddi təcrübəyə malik olan klub həmin yarışlarda şərəfini qoruyan futbolçuları heyətində saxlamağa davam etməklə premyer-liqadakı işini xeyli asanlaşdırıb. Belə uzunömürlü davamlılıq həm maddi dayaqlarda, həm baş məşqçi və futbolçularda özünü göstərirsə, rəqiblərin təkcə əzmkarlığa və mübarizliyə yox, həm də şansa ehtiyacı var.
Bəs "Qarabağ"ın hegemonluğunun kökündə başqa nə dayanır? Bu sualı təcrübəli mütəxəssis Aslan Kərimova ünvanladıq:
"Qurban Qurbanovun "Qarabağ"a gəlişinin şahidi olan biri kimi deyə bilərəm ki, başlıca amil oyunçu seçimidi. Ağdam təmsilçisi onun təyinatından bəri xüsusilə legionerlərlə bağlı seleksiya işində qüsursuz çalışıb və çalışmağa davam edir. Burda futbolçuların fiziki hazırlıq səviyyəsi də çox yüksəkdi. Bu üzdən kollektivin məşqçilər korpusuna təşəkkür düşür. "Qarabağ"ın oyunçuları daim sürətli və dinamik oyun sərgiləməyə qadirdi ki, bunu həm ölkə daxilində, həm də beynəlxalq arenada dəfələrlə görmüşük. Həmçinin Qurban Qurbanov öz oyun sisteminə uyğun oyunçular tapıb. Bu qədər doğru işin içində qalan komandaların yanlış yolda olması "Qarabağ"ı rəqiblərindən ümumi keyfiyyət baxımından yaxşı mənada uzaqlaşdırıb. Məsələn, "Neftçi" uzun illərdi məşqçi dəyişir. Üstəlik oyunçu seçimiylə bağlı çox ciddi səhvlərə yol verirlər. Nəticədə aradakı rəqabət uçuruma gedir. Hazırda "Qarabağ"dan sonra ancaq "Zirə"dən bəhs etmək olar. Düzdü, bu kollektiv hələ Ağdam təmsilçisi qədər baxımlı oyun sərgiləyə bilmir. Lakin iki ildi eyni heyətin qorunub-saxlanması yaxşı məqamdı. Sadəcə, Rəşad Sadıqovun yanaşması daha fərqli ola bilər. Görünür, "Zirə" yeni oyunçular üçün böyük məbləğlər xərcləmək istəmir. Baş məşqçi daha çox Azərbaycanda gördüyü, tanıdığı, oyununa bələd olduğu futbolçulara üstünlük verir. Ümumiyyətlə, uğurun açarı davamlılıqdı. Seçimlər doğrudusa, qısa zamanda sabitlik yaranır və nəticə əldə etmək asanlaşır".
Bəs növbəti mövsümdə "Qarabağ"a "əlcək ata biləcək" komandalar ola bilərmi? Bu mümkündüsə, çempionluğa namizədlər sırasında hansı kollektivləri görə bilərik? Aslan bəyin cavabıyla tanış olun:
"Düşünürəm ki, bu sırada "Sabah"la "Neftçi"ni görəcəyik. Bu komandalar təkcə növbəti mövsümdə yox, həmişə "Qarabağ"a müqavimət göstərməyə çalışacaq. Düzü, "Zirə"nin hansı strategiya ilə davam edəcəyini bilmirəm. Amma bu kollektivi də həmin sıralarda görmək mümkündü. Təbii ki, burda əsas məsələ strukturu qoruyub-saxlamaq, çempionatı tanıyan, bacarıqlı və perspektivli yerli mütəxəssislərə güvənmək, həmçinin düzgün futbolçu seçimidi. "Neftçi" bunu bir dəfə bacarıb. Hadisələrin axarı istədikləri kimi getsə, yenə uğurlu ola bilərlər".
KƏNAN BAHADIR
Digər xəbərlər
