Ötən həftənin əvvəlində ənənəvi “Laureus” mükafatının 2025-ci il üçün mükafatlandırma mərasimi oldu.

"Football-plus.az" xəbər verir ki, “Laureus” dünyada yetərincə nüfuzlu mükafat sayılır, “idman “Oskar”ı” adlandırılır. İspaniya paytaxtına dünya idmanının bir çox nüfuzlu siması təşrif buyurmuşdu. Qaliblər 8 kateqoriya üzrə seçildi.

Gecənin əsas mükafatları
“İlin kşi idmançısı” mükafatı 25 yaşlı isveşli atlet Arman Düplantisə təqdim olundu. O, 2024-ün yayında Parisdə keçirilən Oyunlarda qızıl medal qazanmaqla yanaşı, olimpiya rekordunu (Armanın nəticəsi 6,25 metr) yenilədi. Bu ilin fevralında isə qapalı məkanda şüvüllə tullanmaq üzrə yeni rekord müəyyənləşdirdi – 6,27 m.

28 yaşlı gimnast Simona Baylz “ilin qadın idmançısı” sayıldı. Tokio Olimpiadasını boşa verən amerikalı xanım Paris Olimpiadasında üç qızıl medal qazandı. Bu nominasiyada Baylzın əsas rəqibləri “Barselona”nın oyunçusu Aytana Bonmati (2023, 2024-cü illərdə “Qızıl top”un sahibi) və belaruslu tennisçi Arina Sobolenko idi.
“İlin komandası” üçün ayrılan mükafat “Real”a çatdı.
Madrid nəhəngi 2023/24 mövsümündə Çempionlar Liqasını, İspaniya çempionluğunu, İspaniya Superkubokunu, UEFA Superkubokunu və Qitələrarası kuboku qazanıb. “Real”ın bu nominasiyadakı rəqibləri “Boston” basketbol klubu, “Barselona”nın qadınlardan ibarət komandası, “Formula-1”də çıxış edən “Maklaren”, İspaniyanın futbol və ABŞ-ın kişilərdən ibarət basketbol yığması idi.

“İlin sıçrayışı” nominasiyasında “Barselona”nın 17 yaşlı hücumçusu Lamin Yamal qalib gəldi. İspaniyalı ulduz ötən il yığmanın heyətində Avropa çempionu olub, qatıldığı turnirlərdə bir çox rekord yeniləyib. Yamal mükafat yolunda mübarizədə “San-Antonio”nun basketbolçusu Viktor Vembanyama ilə “Bayer-04”ü qabaqladı.

“Laureus”un təşkilatçıları bu dəfə xüsusi mükafat da təsis etmişdi – “İdman ikonası”. Bu mükafat karyerası boyunca nəhəng uğurlara nail olan idmançılara verilir. Ötən ilin payızında tennis karyerasını bitirən Rafael Nadal mükafatı başı üzərinə qaldırdı. 38 yaşlı ispaniyalının əvvəllər iki dəfə “ilin idmançısı” kimi “Laureus” qazandığını da xatırladaq.

Başqa mükafatlar
Təşkilatçılar başqa ənənəvi nominasiyalar üzrə də qalibləri müəyyənləşdirdi. “Laureus”un versiyasına görə “ilin dönüşü” mükafatına braziliyalı gimnast Rebeka Andrade layiqdi. 25 yaşlı idmançı ağır zədə üzündən Paris Olimpiadasını buraxa bilərdi, ancaq vaxtında bərpa olundu və sərbəst hərəkətlərdə qızıl medal qazandı.

Sağlamlıq imkanları məhdud olanlar arasında “ilin idmançısı” mükafatı çinlu Szyan Yuyyana verildi. 20 yaşlı xanım idmançı Paris Paralimpiadasında 7 qızıl medal qazanıb. “Action” (ilin alternativ idmançısı) nominasiyasında Paris Olimpidasının qızıl medalçısı, britaniyalı veloyürüşçü Tom Pidkok qalib sayıldı. “Xeyirxahlıq üçün idman” nominasiyasında mükafat Lesotoda futbolun təbliği ilə məşğul olan “Kick4life” layihəsinə çatdı.

Sonda mükafatın reqlamentini də xatırladaq. “Laureus”un qısa siyahıları 70-dən artıq ölkədən olan 1000-dən artıq idman mediasının nümayəndələrinin səsverməsi əsasında müəyyənləşir. Ardından “Lauerus” Ümumdünya İdman Akademiyası həmin qısa siyahılar əsasında qalibləri seçir.