Dünən keçirilən oyunlarla futbol üzrə ölkə çempionatının 1-ci liqasında 2023/24 mövsümünə yekun vuruldu.

MOİK-in “İmişli”ni qəbul etdiyi matçda mövsümü 3-cü pillədə bitirən komandanın adına aydınlıq gəldi. Başqa sözlə, “hərbçilər”in qələbəsi Əsgər Abdullayevin kollektivini dördüncü etdi.

“Şamaxı” səbirsizliklə gözlənilən görüşdə qonaqlara, yəni “Araz Saatlı”ya rəhm etmədi. “Şirlər” iki avtoqolun və qırmızı vərəqənin olduğu qarşılaşmada premyer-liqaya vəsiqə qazandı (bu haqda başqa yazıda oxu).

Ramiz Məmmədovun komandası növbəti “futbol ili”ndə elitada çıxış edəcəyinə görə sevinən anda “Qaradağ Lökbatan”ın məyusluğu ikiyə qatlandı. Çünki lökbatanlılar Mingəçevirdən qələbə ilə ayrıla bilmədi. “Nur şəhəri”nin təmsilçisi son dəqiqədə vurduğu qolla 7-ci pilləyə yüksəldi.

Həm bu, həm də “İrəvan”ın “doğma divarlar” arasında “Karvan”ın qapazaltısı olması turun diqqətçəkən məqamlarındandı. Nazim Süleymanovun karyerasına növbəti rəzil məğlubiyyət yazıldısa, yevlaxlılar “futbol ili”nə böyükhesablı qələbəylə yekun vurdu.

“Difai Ağsu” mövsümün sonuncu matçını Şamaxıda yox, nəhayət, Ağsuda keçirdi. Bilindiyi kimi, komandanın 1-ci liqadakı varlığı “Cəbrayıl”a qarşı keçiriləcək pley-off matçlarından asılıdı. Belədə “Zaqatala”dan alınan bir xal işə yaramadısa, qarşıdakı oyunlar üçün motivasiya verdi.

1. Şamaxı 27 16 9 2 60-22 57
2. Qaradağ Lökbatan 27 15 9 3 46-21 54
3. MOİK 27 14 7 6 53-28 49
4. İmişli 27 13 8 6 38-21 47
5. Karvan 27 13 5 9 40-34 44
6. Zaqatala 27 7 10 10 31-34 31
7. İrəvan 27 8 3 16 32-59 27
8. Mingəçevir 27 7 6 14 20-39 27
9. Difai Ağsu 27 5 8 14 33-43 23
10. Araz Saatlı 27 4 1 22 28-80 13
Bombardirlər: Elmir Rəhimzadə (MOİK) – 17, Elşad Tağıyev (Şamaxı) – 15.

KƏNAN BAHADIR