Fevralın 19-20-si aralığında keçirilən oyunlarda futbol üzrə ölkə çempionatının 1-ci liqasında 15-ci turu da geridə qoyduq.

Afişada prinsipial matçların varlığı haqda yazmışdıq. Ona görə ki, artıq mövsümü ilk “üçlük”də bitirəcək komandalar birbaşa premyer-liqaya yüksələcək. Elə bu üzdən “Qəbələ”ni qəbul edən MOİK azı bir xal qazanmalıydı ki, ən pis halda mövqeyini qoruya bilsin. Lakin “hərbçilər” evdə faciəvi nəticəylə üzləşdi. Liderdən 4 cavabsız qol buraxan MOİK həm də güclülərin xal ehtiyatını artırması nəticəsində şansını xeyli azaltdı.

Kaxaber Sxadadzanin komandasını isə ancaq təqdirəlayiq ifadələrə layiqdi. Hadisələrin axarı “qırmızı-qaralar”ı erkən çempionluğa aparır. Təbii ki, bunda ikinci sırada olan “Karvan”ın da payı var. Yevlax təmsilçisi “Cəbrayıl”ın meydanında cəmi bir xal qazandı. Düzdü, qonaqlar son ana qədər hesabda öndə idi. Lakin Morqanın fərdi reydlə cərimə meydançasına daxil olub “çərçivə”ni nişan almaq istəyən Bilalı kobud müdaxiləylə yerdə sərməsi, Elşadın bu üzdən təyin olunan penaltini 90+6-cı dəqiqədə dəqiq yerinə yetirməsi Kənan Kərimovun komandasını büdrətdi.

İlk “üçlük” üçün iddiasını ortaya qoymaq məqsədilə İmişliyə yollanan “Zaqatala” da istəyinə çatmadı. Bölgənin eyniadlı təmsilçisinin meydanından minimalhesablı məğlubiyyətlə qayıdan komanda işini çətinə saldı. Fərid Namazovun komandası isə bu rəqiblə aradakı xal fərqini 6-ya çatdırmaqla yerini möhkəmləndirdi. Mehdi Tahirovun “İmişlə”yə qələbə gətirən qoluna dəfələrlə baxmağa dəyərdi.

Turun əlamətdar hadisələrindən birinə Binədə şahidlik etdik. “Baku Sportinq”in qonağı olan “Mingəçevir”, nəhayət, 14 tur davam edin qələbəsizlik seriyasına nəhayət son qoydu. Füzuli Məmmədovun komandası üç xal sayəsində sonuncu pillədən xilas ola bilməsə də, ardıcıl üçüncü matçda uduzmamaqla “nur şəhəri” üçün yaxşı gələcək vəd etdi. Autsayderə uduzan paytaxt təmsilçisinə gəlincə, görünür, Elman Sultanovun yeganə hədəfi 1-ci liqada qalmaqdı.



Tura “Difai” – “Qaradağ Lökbatan” dueliylə yekun vuruldu. Vacib qələbə Ağsu təmsilçisinin bir pillə irəliləməsinə səbəb oldusa, qonaqların vəziyyətini daha da çətinləşdirdi. Görünür, artıq 1-ci liqada konkret favoritlər formalaşıb və bundan sonra durumun dəyişməsi, hansısa komandada böyük ölçüdə islahatların baş tutması inandırıcı deyil. Bəlkə də tezliklə yalnız 1-ci liqanı tərk etməmək uğrunda mübarizədə intriqa qalacaq.

Bu arada turun diqqətçəkən məqamlarından biri də “İmişli”ni evdə cəmi 300 azarkeşin dəstəkləməsi oldu. Axı daim minlərlə tərəfdar sevgisini tribunaya daşıyırdı. Premyer-liqaya iddia və yetərincə böyük şans hara, doğma komandanı vacib matçda yalqız qoymaq hara...

1. Qəbələ 15 12 3 0 28-1 39
2. Karvan 15 9 3 3 34-19 30
3. İmişli 15 8 3 4 26-13 27
4. Zaqatala 15 5 6 4 20-19 21
5. MOİK 15 6 2 7 20-28 20
6. Baku Sportinq 15 5 3 7 13-20 18
7. Cəbrayıl 15 4 4 7 13-15 16
8. Difai 15 3 4 8 19-30 13
9. Qaradağ Lökbatan 15 3 3 9 17-30 12
10. Mingəçevir 15 2 5 8 12-27 11

Bombardirlər: Emil Qasımov (Karvan) – 11, Bəhruz Teymurov (Karvan) – 10, Seyxan Fərəcov (İmişli) – 7.

Növbəti turun oyunları fevralın 27-28-də keçiriləcək: Mingəçevir – Difai, Qaradağ Lökbatan – İmişli, Zaqatala – MOİK, Qəbələ - Karvan.