"Qarabağ" Misli premyer-liqasının 32-ci tur matçında evdə "Neftçi"ni darmadağın etdi - 3:0.

"Football-plus.az" xəbər verir ki, "köhlən atlar"ın baş məşqçisi Qurban Qurbanov oyunsonrası mətbuat konfransında jurnalistlərin suallarını cavabladı.

- Azarkeşlərimizə təşəkkür edirəm. Bu gün stadionda fərqli ab-hava var idi. Futbol azarkeşsiz çox zəif görünür. Tərəfdarları bütün oyunlarda gözləyirik. Oyuna gəlincə, vacib qələbə qazandıq. Komandamdan razı qaldım. Sona kimi sürətli oyun nümayiş etdirdilər. "Neftçi" bir neçə yaxşı qol epizodu yaratdı. Bu, onların gücündən xəbər verir. "Neftçi"yə, Samir Abasova uğurlar arzulayıram.

- 90 dəqiqə ərzində təzyiqi davam etdirməyiniz "Araz-Naxçıvan"la kubok oyununa hazırlıqla bağlı idi?
- Yox. Yanvar ayından bu yana məşq etmək üçün bu qədər vaxt olmamışdı. Komandanı daha yaxşı bərpa etməyə 8 gün vaxt var idi. Bu gün göründü ki, həmin vaxtdan yararlana bilmişik. Futbolçular əvvəldən sona qədər sürəti qoruyub-saxlaya bildi.

- Kevin Medinanın yayda müqaviləsi bitir. Komandada qalacaq? 4 oyundu ki, oynamır.
- Bu o demək deyil ki, oyunundan razı deyiləm. Silva özünü yaxşı tərəfdən göstərdiyi üçün ona daha çox şans verirəm. Səhv etmirəmsə, hələ bizimlə iki illik müqaviləsi var. Qarşıdakı oyunlarda ona şans verməyə çalışacağıq.

- "Səbail"lə oyundan sonra demişdiz ki, oyun günü komandanın yanından ayrılmaq istəmirəm. Bu gün güləşçi Hacı Əliyevin obyektinin açılışında iştirak etdiz. Bu da ictimaiyyət arasında birmənalı şəkildə qarşılanmadı. Sizcə, İcraiyyə Komitəsindəki həmkarlarınız sizdən küsə bilər?
- Oyun günü məşqimiz olan gün də olur, olmayan da. İcraiyyə Komitəsində 10-15 dəqiqəlik yığıncaq olmur. Saatlarla müzakirələr gedir. İclasda iştirak edə bilməyəcəyimi əvvəlki gündən bildirirəm. Biz bir-birimizi anlayırıq.

- Abbasın mövqeyində Toral oynayır. Abbas rəqabətdə uduzur?
- Abbas zədəli idi. Artıq komandayla məşqlərə başlayıb. Əzələsində problem var idi. Onu birdən-birə oyuna buraxmaq riskdi. Qarşıdakı oyunlarda yavaş-yavaş şans veriləcək.

- Üç qol vurduz, bir o qədər də şansı boşa verdiz. Bu sizi narahat etmir?
- Bu gün istək həddindən artıq çox idi. Daha çox qol epizodları Kadidə oldu. Onun ustalığı həmin fürsətləri dəyərləndirməyə imkan verir. Növbəti oyunlarda daha dəqiq olar.

-  Nəriman Axundzadə bu mövsüm 37 oyunda 10 qol vurub, 12 məshuldar ötürmə edib. Ondan razısız?
- Nəriman son vaxtlar yaxşı mənada dəyişib. Bir müddət əvvəl öz idman formasından uzaq idi. Onunla daim söhbət edirəm. Daha yaxşı olmalıdı. Nərimandan tam razı deyiləm. Daha çox çalışsa, futbolu daha çox düşünsə, potensialı daha yüksəkdi. Bu gün bombardirlər sırasında olmalı idi. Buna borcludu.

- Mahir Emreli son iki oyunda üç qol vurub. "Nürnberq"lə müqaviləsi mövsümün sonunda başa çatacaq. Sirr deyilsə, onu yayda komandaya gətirmək istəyərsiz?
- Mətbuatda klubu ilə yeni müqavilə barədə danışıqlar apardığını oxudum. Mahirlə danışığımız olmayıb. Onun məqsədi Avropada oynamaqdı. Orda oynamağı daha məsləhətlidi.

- Bu mövsüm qarşılaşdığınız "Bude/Qlimt" Avropa Liqasında, Musanın sabiq komandası "Yurqorden" isə Konfrans Liqasında yarımfinala yüksəldi. Musa ordan ayrılmağına peşman deyil?
- Bu haqda danışmamışıq. Məncə, peşman olmağa ehtiyac yoxdu. Geriyə yox, önə baxmaq lazımdı. "Bude/Qlimt" yarımfinala çıxmağa layiq idi. Qalib gəlməyimizə baxmayaraq mənim diqqətimi cəlb edən komanda olmuşdu. Özlərinə xas olan futbol fəlsəfələri var. Vaxtım olsa, ora təcrübəyə də gedərəm. Belə ortabab klubların bu yerlərə gəlib çıxması həmişə diqqətimi cəlb edir.

- Yassin Benzyanı növbəti mövsümdə də komandada görmək istəyirsiz?
- İstəyərəm. Danışıqlar gedir.

KƏNAN BAHADIR