Onlar Bupendzanın ölümü ilə bağlı nə dedilər?
Xəbər verdiyimiz kimi futbol dünyası tanınmış forvard Aaron Bupendzanın faciəvi ölüm xəbəri ilə sarsılıb.
28 yaşlı qabonlu forvard karyerasını Çində davam etdirirdi. O, bu ölkədə 11-ci mərtəbədən yıxılaraq ölüb. Çin polisi məsələnin intiharla əlaqəli olub-olmadığını araşdırır. Bu faciə ilə bağlı artıq ilk reaksiyalar var.
Bupendzanın həmyerlisi, hazırda ''Qalatasaray''da çıxış edən Mario Lemina onunla olan şəklini paylaşaraq bunları yazıb:
''Hüzur içində yat Aaron. Çox istedadlı və gülərüz idin. Tanrı böyükdür və sənin qəlbinin necə böyük olduğunu bilir. Sözlərimi ifadə etməkdə çətinlik çəkirəm. Özünü qardaş və dost sayanlar, eləcə də sənə ağıl verənlər ümid edirəm ki, ən azı valideynlərindən üzr istəyəcəklər. Çünki bu gün səni tanıyan hər birimiz özümüzü günahkar sayırıq. Ruhun hüzur içində yatsın''.
İddialara görə bu hadisə Bupendza qardaşı ilə mübahisə etdikdən sonra baş verib. Bundan başqa bu futbolçunun müqavilə ilə məxsus olduğu Buxarest ''Dinamo''sunun baş məşqçisi Marius Şumudika da açıqlama verib. Bupendza ötən yay Şumudikanın təkidi ilə Rumıniya klubuna keçmiş, amma bu ilin yanvarında Çinə yollanmışdı. Türkiyədə də bir çox klubda işləmiş Şumudika bunları deyib:
''Bu xəbəri eşidəndə tamamilə şok keçirdim. Mənim övladım kimi idi. Göz yaşlarımı saxlaya bilmirəm. Bupendza mənim oğlumla eyni gün, ay və ildə doğulmuşdu. Mənim üçün çox ciddi bir psixoloji zərbədi. Onu həqiqətən həm futbolçu, həm də insan kimi çox bəyənirdim. Artıq kəlimələr yetərsizdi. Başqa nə deyəcəyimi bilmirəm. Meneceri ilə danışmışıq. Növbəti ev oyunumuzda ona həsr olunmuş bir şey hazırlayacağıq. Bundan artıq danışa bilmirəm. Məni də anlayın''.
Xatırladaq ki, Bupendza 2020/21 mövsümündə ''Hatayspor''un heyətində 22 qolla Türkiyə çempionatının bombardiri olmuşdu.
Digər xəbərlər
