“Şamaxı”nı gözləyən maliyyə sıxıntısı nə ilə nəticələnəcək?
AFFA-nın ötən həftənin cümə günü, yəni aprelin 11-də keçirilən Hesabat Konfransında 2025/26 mövsümündə Misli premyer-liqasında çıxış edəcək klublar üçün ayıracağı məbləğ də açıqlandı. Bəlli oldu ki, qurum yeni “futbol ili”ndə də klublar üçün 30 milyon manat ayıracaq. Sadəcə, bu məbləğ artıq 10 yox, 12 komanda arasında bölüşdürüləcək. Bu o deməkdi ki, hər komanda üçün 3 yox, 2,5 milyon manat ayrılacaq.
Bilindiyi kimi, hazırda premyer-liqanın yeganə sponsorsuz klubu “Şamaxı”dı. Növbəti mövsümdən elita klublarının yarışında iştirak edəcəyi dəqiqləşən “Qəbələ”nin də maliyyə durumu pis deyil. Bununla belə, “İmişli”nin də maliyyə dayaqları var. Hələ 2023-cü ilin yayında klubla RDC MMC arasında tərəfdaşlıq müqaviləsi imzalanıb.
İstənilən halda, “Şamaxı”nı rəqibləriylə müqayisədə daha çətin günlər gözləyir. Premyer-liqada legioner limitinin ləğv edilməsi, baş məşqçi Ayxan Abbasovun həm də U-21-i çalışdırması kimi məqamlar bölgə təmsilçisinin gələcəyi ilə bağlı narahatlıq doğurmaya bilməz. Maraq üçün qeyd edək ki, klub ötən mövsüm 1-ci liqada çempion olan heyətinə borclarını bu ilin martında ödəyə bilib. Ümumiyyətlə, hazırda maddi durumuna görə problemlə üzləşəcəyi gözlənilən komandalarla bağlı bütün oxlar “Şamaxı”nı göstərir. Elə Ayxan Abbasov da vəziyyətlə bağlı narahatlığını gizlətmir.
Mütəxəssis “Sumqayıt”la matçdan sonra keçirilən mətbuat konfransında AFFA-nın bu qərarının ən böyük zərbəni “Şamaxı”ya vuracağını etiraf etdi. Təbii ki, belədə ağda Futbolun İnkişaf Fondunun (FİF) fəaliyyəti gəlir. Görəsən, sadalanan məqamlar fondun əsas fəaliyyət istiqamətinin “şirlər”in üzərində cəmləşməsinə səbəb ola bilərmi?
Bu sualla FİF-in icraçı direktoru Tural Piriyevə müraciət etdik. O, "Football-plus.az"a açıqlamasında durumu belə şərh etdi:
“Əvvəlcə “Sumqayıt” üzərində qazanılan qələbə münasibətilə “Şamaxı”nı təbrik edirəm. Ayxan müəllimin də müsahibəsiylə tanışam, dediklərində həqiqət var. “Şamaxı” premyer-liqada tək baş sponsorsuz klub olduğu üçün bizim üçün prioritetlər sırasındadı. Necə ki, vaxtilə “Turan Tovuz” və “Kəpəz” belə idi. Ancaq mən məsələyə başqa prizmadan yanaşardım. Bizim fondun əsas missiyası bölgə klublarının dayanıqlı inkişafına və gəlir diversifikasiyasına nail olmaqdı. Nə dövlət dəstəyi, nə də baş sponsor ömürlük maliyyə kanalı deyil. Hansının nə qədər davam edəcəyini heç kim dəqiq deyə bilməz. Dövlətimizin futbola dəstəyini yüksək qiymətləndiririk. Təki bu dəstək daimi olsun. Lakin tək sponsordan asılılığın hansı nəticələrə gətirib-çıxardığını yaxın tariximizdə də görmüşük. Bu iki sahənin klub tərəfindən idarə edilməsinin mümkün olmadığı nəzərə alınmalıdı. Klublarımız bu müddəti düzgün dəyərləndirib, klubun bir məhsul kimi formalaşmağına və mümkün gəlir kanallarının aşkarlanıb, istifadə edilməsinə ciddi diqqət ayırmalıdı. Təəssüf ki, klublarımızın əsas diqqəti ancaq meydanda başverənlərdədi”.
KƏNAN BAHADIR
Digər xəbərlər
