İtaliya futbolunda yeni qalmaqal başlayıb. Məsələ yenə futbolçuların kontorlara qeyri-qanuni pul qoyuluşu etməsi ilə bağlıdı.

Milan Prokurorluğu artıq bir sıra oyunçularla bağlı təhqiqata başlayıb. Şübhəlilərin siyahısında “Yuventus”un sabiq oyunçuları – hazırda İtaliyada çıxış etməyən Anxel Di Mariya (Benfika) ilə Leandro Paredes (Roma), indi Turin klubunda oynayan Mattia Perin, Ueston Makkenni, Alessandro Florentsi (Milan), Nikolo Zanyolo (Fiorentina), Raul Bellanova (Atalanta), Samuele Riççi (Torino), Kristian Buonayuto (Padova), Matteo Kançelyeri (Parma) və Xunior Firponun (Lids) adı var.

Maraq üçün italiyalı tennisçi, ATP reytinqində 206-cı yeri tutan Matteo Qiqantenin də siyahıya düşdüyünü qeyd edək. İdmançıların 2021-23-cü illərdə qeyri-leqal kontorlarda və onlayn-poker oyunlarında iştirakı şübhə doğurub.

Yeri gəlmişkən, bu, İtaliya futbolunda son iki ildə baş verən ikinci belə qalmaqaldı. Xatırladaq ki, 2023-cü ilin oktyabrında “Nyukasl”ın yarımmüdafiəçisi Sandro Tonali futbol matçlarına pul qoyuluşu etdiyi üçün 10 aylıq müddətə cəzalanmışdı. “Yuventus”un hazırda icarə əsasında “Fiorentina”da çıxış edən yarımmüdafiəçisi Nikolo Facoli bu səbəbdən 7 ay rəsmi oyunlara buraxılmamışdı.

Maraqlıdı ki, Tonali ilə Facolinin adı da şübhəlilərin siyahısında çəkilir. Onların qeyri-qanuni fəaliyyət göstərən kontorlara dostlarını qoşa biləcəyi ehtimal olunur.