“Sabah” – “Kəpəz” oyunundan sonra meydan sahiblərinin baş məşqçisi Vasili Berezutskinin Elvin Camalov haqda dedikləri (“komandamızın keçmiş kapitanı, hazırda “Neftçi”də oynayan Elvin Camalov özünü çox qeyri-peşəkarcasına apardı”) tam üç gün müzakirə olunandan sonra, nəhayət, məsələyə aydınlıq gəldi.

Paytaxt klubu aprelin 9-da rəsmi açıqlama yaymağa məcbur oldu. İş ondadı ki, bu açıqlama özü ilə bərabər çoxlu sual da gətirdi ki, mən yalnız 10-u (!) üzərində dayanacam.

1-ci sual. Elvin Camalovun davranışı ilə bağlı vəziyyətin aydınlaşdırılmasını zəruri sayan “Sabah” sabiq kapitanın iki dəfə əlaqə saxladığı futbolçunun adını niyə açıqlamır? Axı hər kəsə gün kimi aydındı ki, söhbət “bayquşlar”ın nigeriyalı ulduzu Cesse Sekidikadan gedir. Adamın adının açıqlanmaması (açıqlamada “komandamızın əsas oyunçularından biri” kimi tanıdılır) başqa futbolçuların da üzərinə kölgə salmırmı, araya şübhə toxumu səpmirmi?

2-ci sual. Elvin sabiq komanda yoldaşını kubokun yarımfinal oyunundan əvvəl dilə tutmağa, şirnikləndirməyə çalışıbsa, “Sabah” niyə məhz o vaxt etiraz səsini ucaltmayıb, məsələni ictimailəşdirməyib?

3-cü sual. Elvin belə bir danışıq aparıbsa, bu, özünün, yoxsa baş məşqçi Samir Abasovun təşəbbüsü olub?

4-cü sual. Məhz ölkə kubokunun həm “Sabah”ı, həm də “Neftçi”ni avrokuboka aparacaq yeganə yol olduğunu, oyunun önəmini nəzərə alsaq, Elvin belə məqamda Sekidikanı transfer söhbətinə cəlb etməklə aşkar təxribatçı rolunu oynamırmı, bütövlükdə ölkədaxili turnirlərdən birinin şəffaflığını şübhə altına almırmı?

5-ci sual. Berezutskinin məlum mətbuat konfransından 6, “Sabah”ın ittiham dolu açıqlamasından 3 gün ötsə də, niyə Elvin Camalov və “Neftçi” cavab açıqlaması yaymayıb? Lap tutaq ki, Camalov belə məsələlərdə məsuliyyətini dərk etmir, bəs ölkənin ən yaşlı klubuna nə olub? Məgər “Neftçi” imicinin, nüfuzunun, ləyaqətinin müzakirə mövzusuna çevrilməsinin fərqində deyilmi?

6-cı sual. Camalov Sekidika ilə bir yox, bir neçə dəfə əlaqə saxlayıb. “Sabah”ın açıqlamasına inansaq, hətta israr edib. Onun mövsümün çox önəmli məqamında transfer təklifi ilə çıxış etməsi, özü də baş məşqçinin adından danışması məqsədyönlü təxribat deyilmi?

7-ci sual. Transferlər zamanı, adətən, baş məşqçi niyyətini açıqlayır, ya konkret futbolçunun, ya da güclənməli olan mövqenin adını çəkir, klubun skautları və ya başqa səlahiyyətli şəxslər danışığa başlayır. “Neftçi”də bütün bu prosedurlara əməl olunmamasının günahkarı kimdi? Doğrudanmı, bu klubda transfer söhbətlərini hansısa futbolçu aparır?

8-ci sual. “Sabah” bu açıqlamadan əvvəl “Neftçi” ilə əlaqə saxlayıbsa, “iki klub arasında qarşılıqlı hörmətə əsaslanan münasibətlər mövcuddusa”, niyə məsələ ictimailəşdi? Niyə paytaxt klubları məxfi söhbət zamanı barış nöqtələri tapa bilmədi, niyə “Sabah” AFFA-ya müraciət etməli oldu?

9-cu sual. Camalov Sekidika ilə asanlıqla təmasa keçə, hətta transfer təklifi çatdıra bilirsə, ölkədaxili turnirlərdə danışılmış oyunlar, nəticələrin manipulyasiyası, futbolçuların bu işlə fəal şəkildə məşğul olması ilə bağlı ehtimallar artmayacaqmı?

10-cu sual. Bütün başverənlərdən sonra paytaxt klubları arasındakı cavab görüşündə az qala hər epizodun detallı şəkildə təftiş olunmayacağına, hər şeyə şübhə ilə yanaşılmayacağına kim təminat verir? Ümumiyyətlə, ölkə futbolu bu gərginliyin altından necə çıxacaq?

...Həvəsim yoxdu, olsaydı, sualların sayını bir qədər də artıra bilərdim. Bəlkə də Elvin məsuliyyətini dərk edib vaxtında üzr istəsəydi, məsələ bu yerə çatmazdı. Amma indi ox yaydan çıxıb. Elvinin düşüncəsiz hərəkəti ilə ölkə futbolunda böyük bir qalmaqalın əsası qoyulub. Futbol ictimaiyyəti Elvindən və “Neftçi”dən cavab gözləyir. Susmaq isə təkcə bizim ölkədə yox, hər yerdə razılıq əlaməti sayılır.

HUŞƏNG