Renatgil döyər, yoxsa Bədavigil? – REPLİKA
Yığmanın və “Qarabağ”ın sabiq kapitanı Maksim Medvedev İctimai Televiziyanın “OffTOP” layihəsinin qonağı olub və tükürpədən açıqlamalar verib.
Bunlardan ən diqqətiçəkəni isə millidə əvvəl də, indi də qruplaşmaların olmasıyla bağlı işlətdiyi ifadələrdi:
“Biz oynadığımız vaxtlarda komandada çıxış edən ukraynalılar – Levin, Axtyamov və başqa qruplaşmalar var idi. İndi də Renat Dadaşovun, Bədavi Hüseynovun və Ramil Şeydayevin qrupu var. Təbii ki, bu, meydanda da hiss olunacaq. Hərə özünü fikirləşir”.
Əlbəttə, bu iddialar dərhal AFFA tərəfindən araşdırılmalı və həqiqətəuyğundusa, məsələyə müdaxilə edilməlidi. Amma maraqlıdı ki, aprelin 1-dən bəri gündəmi zəbt edən mövzu ilə bağlı nəinki futbol qurumu, futbolçular özü də nəsə deməyib. Təbii ki, bu, yığmamızın ardıcıl məğlubiyyətlərinin, ciddi uğursuzluqlarının yeganə səbəbi deyil. Bu mövzunu dərinləşdirmək, problemlərin kökünü tapmaq samanlıqda iynə axtarmaq kimidi. Lakin heç olmasa, belə etməyin. AFFA-nın “Biz birlikdə güclüyük” deviziylə başına yığdığı, dövlət bayrağını və himnini, futbolumuzun nüfuzunu əmanət etdiyi adamlar bir-birinə kəm gözlə baxa bilməz!
Bir komandada qruplaşmalar varsa, sözsüz, nə qol vurmaq mümkün olar, nə də qələbə qazanmaq. Belədisə, heyətin gəncləşdirilməsi sürətlənməli, ayrı-seçkilik edən oyunçular yığmadan kənarlaşdırılmalıdı. Qruplaşma varsa, Millətlər Liqasında qrup-qrup aşağı düşməyimiz də sürpriz deyil, nəinki rəsmi matçlarda uduzmaq, hətta yoldaşlıq oyunlarında belə qol vura bilməmək də.
Biz tribunalara millinin işığına toplaşırıq, “Renatgil döyər, yoxsa Bədavigil” sualına cavab tapmaq üçün yox!
KƏNAN BAHADIR
Digər xəbərlər
