Mbappe “Qızıl top”u qazanmaqla ÇL-in qalibi olmağı müqayisə etdi
Kilian Mbappe ispaniyalı jurnalistlərin bir sıra suallarını cavablayıb.
"Football-plus.az" xəbər verir ki, ötən yay PSJ-ni azad agent kimi tərk edərək “Real” ilə 5 illik müqavilə bağlayan fransalı hücumçu bir sıra variantlar arasında məhz hazırkı klubuna üstünlük verdiyini deyib.
Bu mövsüm ağ formada müxtəlif turnirlərdə 46 oyuna çıxan Mbappe 32 qolun və 4 məhsuldar ötürmənin müəllifi olub. O, Madridə gəlməzdən əvvəl bir sıra başqa klublardan da təklif alıb:
“Başqa klublar? Çox yaxşı təkliflər almışdım, amma mən yalnız “Real” haqda düşünürdüm. Mən indi bu klubla tarix yazmaq istəyirəm”.
DÇ-2018-də Fransa yığması ilə çempion olan 26 yaşlı hücumçu jurnalistlərdən birinin depressiya ilə bağlı sualını belə cavablayıb: “Bu problemdən əziyyət çəkən bir neçə adamı tanıyıram. Komanda yoldaşlarım da depressiya yaşayıblar. Bir müddət o qədər də yaxşı oynamadım, amma problemim psixoloji xarakerli deyildi. Haqqımda cürbəcür fikirlər dolaşırdı. Bəzilərinin barəmdə həqiqət olmayan iddialar səsləndirməsi mənim üçün heç də xoş deyildi. Ona görə ki, depressiya çox ciddi mövzudu. İndi cəmiyyətdə bu problem haqda danışmaqdan çəkinmirlər. Fikrimcə, bu, yaxşı haldı. Bu məsələyə böyük hörmətlə yanaşıram”.
Kilian “Qızıl top”u qazanmaqla Çempionlar Liqasının (ÇL) qalibi olmağı müqayisə edib. O, hazırkı komandası ilə ÇL-də qələbəyə üstünlük verdiyini deyib:
“Qızıl top” fərdi bir mükafatdı. Mən həmişə demişəm ki, “Real”da olmağın qiyməti yoxdu. Çempionlar Liqasında qalib gəlmək və klubun tarixinin bir parçası olmaq istəyirəm. Müəyyən hədəflərim var. Mən qol vurmağı sevirəm, amma ən əsası La Liqa və Çempionlar Liqası da daxil olmaqla komanda ilə kuboklar qazanmaqdı”.
Digər xəbərlər
