"Qarabağ" Misli premyer-liqasının evdə keçirilən 29-cu tur matçında "Zirə"ni məğlub etdi - 1:0.

"Football-plus.az" xəbər verir ki, "köhlən atlar"ın baş məşqçisi Qurban Qurbanov oyunsonrası mətbuat konfransında jurnalistlərin suallarını cavabladı.

- Futbolçularımı təbrik edirəm. Çox gərgin oyun keçirdik. Oyunçularım çox əziyyət çəkdi. Rəşadı da təbrik edirəm. Çox yaxşı komanda formalaşdırıb. Ağılıı və düzgün müdafiə olundular. Azarkeşlərimizə də bizimlə olduqları üçün təşəkkür edirəm.

- Kadinin gəlişindən sonra Benzyanın mövqeyi bir qədər dəyişib. Benzyadan nə dərəcədə razısız?
- Benzyanın düşüncələrindən və oyunu idarə etməsindən çox razıyam. Bəlkə bu gün yorğun göründü. Amma istəklərimi meydanda yerinə yetirən futbolçudu.

- Kadinin durumu necədi?
- Ayağı şişib. Özü meydandan çıxmaq istədi. Ümid edirik ki, zədəsi ciddi olmaz.

- Ölkə kubokunun yarımfinal mərhələsinin cavab oyunlarını əcnəbi hakimlərin idarə etməsini istərdizmi?
- Yox.

– İntizam Komitəsi planşeti qırmağınıza görə sizi cəzalandırmadı. Nüfuzunuzdan çəkindilər?
– Niyə cəzalandırmalıydı ki? Orda təkcə hakimə yox, futbolçuma da etiraz etdim. Oyundankənar epizod idi. Cəza olsaydı, problem olmazdı. Əvvəlki oyunlarda da qırmızı vərəqələrə görə etiraz etmişəm. Sözümün arxasındayam.

– AFFA İcraiyyə Komitəsinin üzvü kimi bir ili başa vurduz. Bu müddət ərzində ölkə futboluna nə qazandırdız?
– Bir ildə nəsə etmək asan deyil. Görülən işlər bir neçə il sonra bəhrə verəcək.

- AFFA İcraiyyə Komitəsi aşağı yaş qrupları üzrə milli komandaları uğursuz baş məşqçilərin səlahiyyətinə verdi. Sizcə, düzgün qərar idi?
- Xahiş edirəm, mənə AFFA İcraiyyə Komitəsiylə bağlı suallar verməyin.

– Əsas rəqibinizdən - "Zirə"dən 15 xal öndəsiz. Bu xal fərqi qarşıdakı matçlarda komandaya necə təsir edəcək?
– Ciddi rəqəmdi... Bəlkə də futbolçularda bir az arxayınlıq var. Çox gərgin mövsüm keçirdik. Bəzən görürəm ki, oyunçular futboldan doyublar. Bəzən çox şey tələb edəndə əsəbləşirlər. Bu normaldı. Özümüzdə də belə hallar baş verir. Çalışıram ki, komandamı toparlayım. Bəzən mənim də hazırlıqsız vaxtlarım olur. Düşünürəm ki, sərbəstliyin futbolçulara faydası olacaq.

– Sizə Çempionlar Liqasının 1-ci yoxsa 2-ci təsnifat mərhələsindən başlamaq daha yaxşıdı?
– Sərf edən minimum 3-cü olar (gülür). Ən azından bilərdik ki, Avropa Liqasındayıq. Əslində, nə qədər gec başlasaq, o qədər yaxşı olar. Qarşıda kubok və premyer-liqa matçları var. Milli komandaların da oyunu olacaq. Futbolçuların istirahət üçün vaxtı az olacaq.

– Azarkeşlər sizdən hər iki kuboku qazanmağınızı tələb edir. Söz verirsiz?
– Mən heç vaxt hər ikisini qazanmaq istəmədiyimi deməmişəm. Azarkeşlər məndən tələb etmirlər. Sadəcə qalib gəlmək istəyirlər. Bunu mən də istəyirəm. Tərəfdarlarımız həm uğurlu, həm də uğursuz günlərdə yanımızdadılar.

KƏNAN BAHADIR