"Futbolçularımı təbrik edirəm. Çox gərgin oyun oldu. Vacib 3 xal əldə etdik. Qarşımızda istəkli və ciddi rəqib var idi. Belə geridönüşlər futbolçulara inam verir. Azarkeşlərimizə təşəkkür edirəm".

"Football-plus.az" xəbər verir ki, bu sözləri "Qarabağ"ın baş məşqçisi Qurban Qurbanov Misli premyer-liqanın 20-ci turunun "Kəpəz"lə matçından sonra keçirilmiş mətbuat konfransında deyib. O, jurnalistlərin suallarını cavablandırıb:

- Nədən narazı qaldınız?
- Çox deməzdim. Narazı qaldığım bəzi epizodlar oldu. Qəbələdə, Gəncədə, Tovuzda yaxşı oyun göstərmək çətindi. Amma futbolçular ciddi və diqqətli idi.

- Buraxdığınız qolu necə şərh edərdiniz?
- Şərh olunacaq bir şey yoxdu. Standart vəziyyətdi. Qapıçı ilə Bəhlulun toqquşmasından sonra boşluq yarandı.

- Benzyanın zədələndiyi epizodda qapıçıya qırmızı vərəqə verilməli idi? Futbolçunun durumu necədi?
- Qərar hakimlərin olmalıdı. Məncə, həmin epizod qırmızı vərəqə idi. Amma paltardəyişmə otağında qapıçılarımız dedilər ki, orada "qırmızı" yox idi. Benzyanın durumu yaxşı deyil, həkimlər başına tikiş qoydu. Baş gicəllənməsi var idi. Çox sərt zərbə aldı. Dəqiq durumu sabah bilinəcək.

- Redon Cicanın zədəsi ciddidi?
- Ciddi bir problem olmalı deyil. Yorğunluqdan əzələsində gərilmə oldu. Sabahkı müayinədən sonra dəqiq məlumat biləcəyik.

- Riçard Almeydanın yerdə qaldığı epizodda Marko Veşoviç etiraza görə sarı vərəqə gördü. Bundan sonra Bədavi onunla çox aqressiv danışdı. Onu bu davranışına görə əvəzlədiz?
- Bədavidən heç nə olmaz. Qoy aqressiv davranmağı öyrənsin. Əvvəlcədən bu əvəzetməni planlaşdırmışdıq. Sıx qrafikdəyik. Futbolçuları çox yormaq olmaz.

- İkinci yerdən 17 xal öndəsiz. Belə durumda komandanı motivasiya etmək çətin deyil?
- Deməzdim təsir edir. Mənim tələblərim, proqramım olduğu kimi davam edir. Futbolçular da bunu ürəkdən yerinə yetirir. Nə qədər desək də, bəzən futbolçularda arxayınlıq olur. Amma bu, o demək deyil ki, biz hər şeyi təmin etmişik.

- Aleksey İsayev "Braqa" ilə oyunlara qədər komandaya uyğunlaşacaq?
- İsayevin tələblərimizə uyğunlaşmağa ehtiyacı yoxdu. Təcrübəli futbolçudu. Amma onun potensialı bu deyil. Daha da yaxşı olmalıdı. Komandaya fayda verəcək futbolçudu. Gələcəkdə ondan daha yaxşısını tələb edəcəyik.

- Xabi Alonso ilə görüşdükdən sonra onun adı "Liverpul"la hallanır. Görüş zamanı bu haqda danışdınız?
- Yox. O barədə danışmadıq. Biz sırf işlə bağlı görüşmüşük.