Bu gün Qusarı 2-ci liqada təmsil edən klublardan (“Şahdağ Qusar”, “Qusar”) heç biri doğma rayonda oynaya bilmir. Çox sadə bir səbəb var: Qusarda oyun keçirmək üçün stadion yoxdu. Halbuki Şövkət Orduxanovun adını daşıyan idman qurğusu bir vaxtlar ölkədə sayılır-seçilirdi.

2001-18-ci illər aralığında “Azərenerji” Açıq Səhmdar Cəmiyyətinin prezidenti kimi çalışan Etibar Pirverdiyev Qusar futbolunu və konkret idman qurğusunu hansı vəziyyətə salıbsa, çıxış yolu görünmür. Qusar futbolunun ağsaqqallarından olan, indi də “Şahdağ”ın təsisçisi kimi qalan, bu klubun möhür-ştampını evində saxlayan İlham Murtuzayev növbəti dəfə redaksiyamıza təşrif buyurmuşdu.

- İlham müəllim, Bəybala Məmmədovu 2001-də klub prezidenti təyin etmisiz, 2002-nin fevralında da onunla vidlaşmısız. Amma klubun möhür-ştampını qaytarmayıb, əksinə, “Şahdağ-Samur”u yaradıb. İndi “Şahdağ-Samur” da yoxdu. Düzdü?
- Klub məhkəmə qərarı ilə ləğv olundu və möhür-ştampı mənə qaytardı.

- “Şahdağ”ı 2003-cü ildə Etibar Pirverdiyevə verdiz. Ümid edirdiz ki, klubu elitada saxlayacaq, iddialı edəcək. Sizlə Etibar Pirverdiyev arasında vasitəçi kim oldu? İşbirliyi necə alındı?
- Klubun maliyyə problemləri var idi. Əvvəl dostlarım var idi, kömək edirdilər, amma Bəybala Məmmədovla bağlı məsələdən sonra onlar da çəkildi. Sonra Etibar Pirverdiyevin qaynı məni axtarıb tapdı, mənə dedi ki, kişi səni görmək istəyir. Oturduq maşına, gəldik Bakıya. Girdim Pirverdiyevin kabinetinə. Mənə dedi ki, “ komandanı necə lazımdı saxlayacam, hər şey yaxşı olacaq”. Bir daha Pirverdiyevi görmədim.

- İlk və sonuncu dəfə 2003-də gördüz, eləmi?
- Bəli.

- O vaxt normal vəziyyətdə olan Şövkət Orduxanov adına stadion Həmkarlar İttifaqının balansında idi?
- Bilmirəm.

- Bəs stadiondan necə istifadə edirdiz, pul ödəmirdiz? Kommunal xidmətləri, qazona qulluq xərclərini kim ödəyirdi?
- “Məhsul” cəmiyyəti ödəyirdi hamısını.

- Şikayət məktublarınızdan anladığım qədəri ilə Etibar Pirverdiyevin klubu götürməkdə məqsədi o olub ki, stadionu da ələ keçirsin. Onun sizə belə niyyətlə yanaşdığına nə vaxt əmin olduz?
- Stadionu sökməyə başlayanda.

- Pirverdiyevin niyyətini anlayandan sonra stadionu “Şahdağ”ın balansına keçirmək istədiz.
- Elədi, onlar paltardəyişmə otağını sökəndən sonra getdim İcra Hakimiyyətinə. Orda mənə açıq-aşkar dedilər ki, Pirverdiyevə gücümüz çatmır, sən olmasaydın, çoxdan orda evlər tikmişdi.

- Bəs Pirverdiyev stadionun sökülməsi üçün icazəni kimdən almışdı?
- Nə icazə, ona icazə lazımdı?

- Bildiyimə görə, stadionun yeri hazırda boş ərazidi. 2018-də vəzifədən uzaqlaşdırılan, gözdən düşən Pirverdiyev də, yəqin ki, ev tikmək fikrindən daşınıb.
- Xeyr, əl çəkmir.

- Nə vaxtdan bu stadionda heç bir iş görülmür?
- Üç ildi heç bir iş görülmür.

- Məhkəməyə müraciət etmisiz? Nə cavab veriblər bu məsələ ilə bağlı?
- Onlar da məni yola verdi.

- Bəs indi nə istəyirsiz?
- Mən həmişə istəmişəm ki, “Şahdağ” Azərbaycan çempionatlarında iştirak etsin, yaxşı yerlər tutsun. İndi, sadəcə, istəyim odu ki, stadion tikilsin, Pirverdiyev Qusarda istədiyini edə bilməsin.

- Qusarın İcra Hakimiyyəti bu yöndə sizə hansısa yardım göstərib?
- Təəssüf ki, yox.

İlham Murtuzayev Qusarın icra qurumları ilə yanaşı, AFFA-dan da bu məsələdə yardım gözləyir.

MÜZƏFFƏR QULUZADƏ