Millətlər Liqasında gələn mövsüm B Liqasında oynamaq uğrunda pley-offun cavab oyununda İrlandiya Bolqarıstanı qəbul etdi.

''Football-plus.az'' xəbər verir ki, ilk görüşdə İrlandiya səfərdə 2:1 hesabı ilə üstün olmuşdu. Dublindəki cavab oyununa Xəlil Umut Meler təyinat almışdı. Amma oyun hazırda Türkiyənin ən yaxşı hakimi hesab olunan Meler üçün çox uğursuz alındı.

Təcrübəli hakim 37-ci dəqiqədə zədələndiyi üçün bir müddət oyunu saxlamalı oldu. O, kənara gəldikdən və tibbi personal ilə müzakirələr apardıqdan sonra oyunu davam etdirdi. Bolqarıstan fasiləyə minimal üstünlüklə yollandı. Amma Xəlil Umut Meler ikinci hissəyə çıxa bilmədi. Onun zədəsi üzündən ikinci hissə 8 dəqiqə gec başladı!

Həkimlərin bütün cəhdlərinə baxmayaraq ikinci hissəni görüşün 4-cü hakimi Mehmet Türkmən idarə etməli oldu. Bu hakimin ayağı qonaqlara düşərli olmadı. Böyük həyəcana səhnə olan oyunda İrlandiya fasilədən sonra 2 qol vuraraq əzmkar qələbə qazandı. İrlandlar bu nəticə ilə B Liqasındakı yerlərini qorudular. Bolqarıstan isə ML-də yenə C Liqasında çıxış etməli olacaq.

ƏLİ