“Şamaxı”dan Ayxan Abbasovun iki yerdə çalışmasına reaksiya gəldi
SOCAR-ın inzibati binasında AFFA İcraiyyə Komitəsinin növbəti iclası keçirilib.
Maraqlı qərarlardan biri də U-21 yığmasının baş məşqçi postunun hazırda “Şamaxı”nı çalışdıran Ayxan Abbasova tapşırılmasıdı. Onunla müqavilənin müddəti 2 illiyə nəzərdə tutulub. Bəs belədə Ayxan bəy həm klubu, həm də gənclər yığmasını paralel şəkildə çalışdıracaq? Bunu öyrənmək üçün AFFA-nın Mətbuat və İctimaiyyətlə Əlaqələr departamentinin rəhbəri Elnur Məmmədliyə müraciət etdik. O, qəzetimizdə açıqlamasında Abbasovun paralel şəkildə çalışacağını söylədi.
“Şamaxı”nın da mövqeyini öyrənməyi lazım bildik. Görəsən, mütəxəssisin həm U-21-i, həm də “Şamaxı”da çalışmasına raqzılıq verilibmi? Bu məqam klubdakı işinə mane olmayacaq ki? “Şamaxı”nın idman direktoru Kamran İsmayılovun cavabı:
“Ayxan müəllimin mövsümün sonuna kimi “Şamaxı” ilə müqaviləsi var. Bizimlə də danışıq aparılıb və razılıq vermişik. Ümumiyyətlə, heç mane olmayacaq desəm, yalan danışmış olaram. Bunu mane adlandırmazdım. Çətinliklər ola bilər. Bizim klubun baş məşçqisinin yığmaya təyinat almasını şərəf sayırıq. Bu təyinat göstərir ki, məşqçi seçimini doğru etmişik. Məşqçilər korpusu və klub rəhbərliyi olaraq, işimizi elə quracağıq ki, Ayxan müəllimin iki yerdə işləməsinin problemlərini minimuma saldıraq. Hamımız yeri gələndə millini də düşünməliyik”.
ƏSƏD SEYİDOV
Digər xəbərlər
