Ronaldo artıq prezident olmaq istəmir
Ronaldo fikrini dəyişib. Əfsanəvi sabiq futbolçu Braziliya Futbol Konfederasiyasının prezidentliyinə namizədlikdən imtina edib.
Qeyd edək ki, futbol qurumunun rəhbərini müəyyən edəcək seçkilər 2026-cı ilin martından gec olmayaraq keçirilməlidi. İkiqat dünya çempionu və hazırda İspaniyanın “Valyadolid” klubunun sahibi olan 48 yaşlı Ronaldo artıq prezident olmaq istəmədiyi barədə sosial şəbəkə hesablarında paylaşım edib:
“27 federasiya ilə ilkin əlaqədən sonra başa düşdüm ki, onlardan 23-nün qapıları mənim üçün bağlıdı. Əksər federasiyalar məni qəbul etmək istəmədilər. Dedilər ki, hazırkı rəhbərlikdən razıdılar. Öz layihəmi təqdim edə, fikirlərimi bölüşə bilmədim ki, məni istədiyim kimi başa düşsünlər. Rəhbərlərin çoxu konfederasiyanın hazırkı prezidentindən razıdılar. Bu, onların haqqıdı və mən belə mövqeyə hörmətlə yanaşıram”.
Xatırladaq ki, Ronaldo 1994-2011-ci illərdə Braziliya yığmasında çıxış edib, milli formada 98 oyuna 62 qol vurub. Yığma ilə DÇ-1994 və DÇ-2002-nin qalibi olan sabiq hücumçu karyerası ərzində “Kruzeyro”, PSV, “Barselona”, “İnter”, “Real”, “Milan” və “Korintians”da oynayıb və iki dəfə “Qızıl top”a layiq bilinib.
