Xəbər verdiyimiz kimi, “Trabzonspor”da 5-ci Şenol Günəş dönəmi başa çatdı. Evdə autsayder “Hatayspor”la oyunda qeydə alınan 1:2 hesablı sürpriz məğlubiyyətin ardından rəhbərliklə təcrübəli mütəxəssis əməkdaşlığı dayandırmaq qərarına gəldi.

Artıq yeni baş məşqçi bəllidi. Onun kimliyinə keçməmiş Günəşin əfsanəsi olduğu klubda işləməyə davam edəcəyini bildirək. 72 yaşlı futbol adamı ilə yollar qarşılıqlı şəkildə ayrıldığı üçün ona təzminat ödənilməyəcək. Günəş bundan sonra qaradənizlilərdə idman direkotru kimi çalışacaq.

Yeni məşqçi isə fanatların sevimlisi olan Fatih Təkkədi. 47 yaşlı bu mütəxəssisin təyinatı hələ sentyabrda baş tuta bilərdi. Amma həmin vaxt o, “Alanyaspor”un başında olduğundan rəhbərlik Günəşə üstünlük vermişdi. Təkkə əslən trabzonludu və futbolçu kimi klubun əfsanələrindən sayılır. 2004/05 mövsümündə bu klubun heyətində vurduğu 31 qolla Türkiyə çempionatının bombardiri olub. “Altyapı” dönəmini də nəzərə alsaq, o, bu klubda ümimilikdə 15 il keçirib. 2006-cı ildə 7,5 milyon avroya “Zenit”ə transfer olunan və futbolçu kimi əsas titullarını Rusiyada qazanan Təkkə beləcə 19 ildən sonra doğma klubuna məşqçi kimi qayıtdı. Məşqçi karyerasına isə o, 2015-də “Ərciyəsspor”da start verib. Daha sonra “Boluspor”, “Manisaspor”, “Dənizlispor”, “İstanbulspor”, “Bursaspor” və sonuncu dəfə “Alanyaspor”da çalışıb.

Təkkənin indiyə qədər məşqçi karyerasında ciddi uğuru yoxdu. Amma göründüyü kimi, o, buna qədər əsasən ortabab və aşağı liqa klublarında çalışıb. Belə klublarla isə uğur qazanmaq çətindi. Bununla belə, Təkkənin komandaları həmişə oyunu ilə diqqəti çəkib, zaman-zaman sürpriz nəticələrlə yadda qalıb. Ona görə də onun ilk dəfə iddialı və nəhəng klubda necə təsir bağışlayacağı maraq doğurur. Martın 11-də onunla 4,5 illik müqavilə imzalandı. Klubdan verilən açıqlamada Təkkənin illik qazancının 30 milyon lirə (təxminən 750 min avro) olacağı qeyd olunub. Hər növbəti ildə isə bu məbləğ 20 faiz artacaq. Fanatların ilk məşqdə Təkkəyə dəstək vermək üçün bazada izdiham yaratması diqqəti çəkib. Bu mütəxəssisi debüt matçında çox çətin sınaq gözləyir. “Trabzonspor” bu gün səfərdə “İstanbul BŞ” ilə qarşılaşacaq. Komandanın bu mövsüm superliqada səfərdə qələbəsi yoxdu (12 oyun, 5 heç-heçə, 7 məğlubiyyət). Qaradənizlilər tarixdə ilk dəfə superliqada mövsümün ilk 12 səfər oyununda qələbəyə həsrət qalıb. Bu sindrom Təkkənin ilk oyunundaca qırılsa, bunun psixoloji cəhətdən də komandaya böyük faydası dəyəcək. Yeri gəlmişkən, Fatih Təkkə klub tarixində həm futbolçu, həm də baş məşqçi kimi “Trabzonspor”a xidmət etmiş 13-cü isim oldu!

Bu günə qədər “Trabzonspor”da 12-si əcnəbi olmaqla 44 məşqçi çalışıb. Təkkədən öncə “bordo-mavililər”ə həm futbolçu, həm də məşqçi kimi xidmət edən isimlər bunlardı: Ahmet Suat Özyazıcı, Özkan Sümər, Şenol Günəş, Əli Kamal Dənizci, İlyas Akçay, Turqay Semercioğlu, İhsan Dərəlioğlu, Tolunay Kafkas, Hami Mandıralı, Şota Arveladze, Ünal Karaman, Hüseyn Çimşir. Bu siyahıya Sadi Təkəlioğlu ilə Ahmet Özəni də əlavə etmək olar. Amma onlar futbolçu kimi əsas komandada yox, “Trabzonspor”un “alt yapı”sında forma geyib.