Ter Ştegen xəyanət amilini “yalançı iddia” adlandırdı
Mark-Andre ter Ştegen həyat yoldaşından ayrılıb. “Barselona”nın qapıçısı Daniela Jehle ilə nigahını rəsmən pozub.
Bu barədə almaniyalı futbolçu sosial şəbəkə hesablarında paylaşım edib. O, evlilik həyatına son qoyduqlarını və bunun özləri üçün ən yaxşı addım olduğunu bildirib:
“Dani və mən diqqətlə düşünəndən sonra yollarımızı ayırmaq qərarına gəldik. Bu qərar təsəvvür etdiyiniz qədər asan olmadı. Lakin hər ikimiz inanırıq ki, bu, bizim üçün ən yaxşı addımdı. Artıq məqsədimiz uşaqlarımız üçün ən yaxşısını etmək, onların sevgidolu və sabit bir mühitə sahib olmalarını təmin etməkdi. Biz valideynlər kimi birlikdə işləməyə və həmişə olduğu kimi bir-birimizə hörmət və minnətdarlıqla yanaşmağa sadiqik”.
Mark-Andre ilə Daniela 2017-ci ildə ailə qurmuşdular. Artıq onların boşanması ilə bağlı maraqlı iddia da ortaya atılıb. Bir mənbə ayrılığa xəyanət amilinin yol açdığını vurğulayıb. Ter Ştegen İspaniya mediasında boşandığı həyat yoldaşının ona xəyanət etməsi ilə bağlı yayılan xəbərə münasibət bildirib. O, sosial şəbəkə hesabındakı paylaşımında bu barədə yazaraq xəbərlərin yalan olduğunu qeyd edib:
“Hörmətli ictimaiyyət, Katalunya Radio Cat Group media şirkətində zəif idarəçilik və nəzarətin olmaması məni şoka salır, məyus edir. Onlar yalan xəbərlər yaymaqla, insanların hüquqlarını pozmaqla məşğuldular. Bu radionun jurnalistləri həyat yoldaşım Danielanı və onun nüfuzunu açıq şəkildə təhqir edən yalançılardı. Danielanın heç bir xəyanəti yox idi. Bu faktdı. Dani və mən qarşılıqlı qərarla ayrılmışıq. Amma dostluq münasibətlərimizi yenə də qoruyuruq. Aparıcı dövlət mediasının Danielanı yalandan ittiham edən bu məlumatı yayması tam qəbuledilməzdi”.
