"Narazı qaldığımız məqamları həmişə dilə gətirmişik, gətiririk və gətirəcəyik. Üzücü məqam belə hadisənin AFFA ilə dialoqumuzun ən yaxşı mərhələsində baş verməsi oldu. Üzgünük. İstər futbol ictimaiyyəti, istərsə də azarkeşlər qurumla klub arasında hansısa qarşıdurma yaşandığını zənn etdi. AFFA bir çox mövzuda bizə dəstək verir. Qurum həm lisenziyalaşdırma məsələsində, həm də stadionumuzun UEFA standartlarına uyğun hala gətirilməsində bizə yardım edir. Hər şey yüksək səviyyədədi. O başqa məsələ ki, məlum qərarın haqsız olduğunu düşünürük. Amma anlayışla qarşılayırıq. İlk belə cəza alan komanda deyilik və yəqin sonuncu da olmayacağıq".

"Futbolçularımızın və azarkeşlərimizin bütün diqqətini yalnız oyunlara yönəltmək istəyirik. Bu üzdən məsələnin böyüdülməsinin tərəfdarı deyilik. Düzdü, bu mövzu İdarə Heyətinin qarşıdakı iclasında daha ətraflı şəkildə müzakirə olunacaq. Lakin ilkin qərar Apellyasiya Məhkəməsinə müraciət etməməkdi. Hər halda, bu məsələdə şərəf və layəqətin alçaldılmasından söhbət gedə bilməz. Düşünmürük ki, kimsə AFFA-nın haqlı olduğunu fikirləşsin. Əslində istəyimiz böyük bir şey deyildi. Sadəcə, matçın təxirə salınmasını xahiş etdik. Ola bilsin, uyğun vaxt deyildi və ya başqa səbəblər ortaya çıxdı. AFFA ölkə futboluna nəzarət edən qurumdu. Verdiyi qərarlara hörmətlə yanaşırıq. Sonradan AFFA-ya yeni təyin edilmiş baş katiblə (Cahangir Fərəcullayev nəzərdə tutulur - red.) görüşdük. Münasibətlər normaldı. Bütün məqamlara aydınlıq gətirmişik. Azarkeşlərimiz narahat olmasınlar. Biz şəraitdən asılı olmayaraq, istənilən halda klubumuzun mənafeyini qoruyacağıq. Etirazımız olanda dilə gətirəcəyik. Yenə də böyüdüləsi nəsə yoxdu".

"VAR ölkəyə niyə gətirilib? Hakim də insandı. Bəzi məqamlar gözündən yayına bilər. Biz əsla hansısa qərəzin olduğunu düşünməmişik. Dünyanın sonu deyil ki... Belə məqamlar məni futboldan uzaqlaşdıra bilməz. Azarkeşlərimiz əsla narahat olmasın. Belə şeyin baş verməsi mümkün deyil. AFFA-da peşəkar insanlar çalışır. Yeni strateji layihənin reallaşdırılması yönündə addımlar atılır. Futbolun inkişafına dəstək olmalı, atılacaq addımların nəticələrini görməliyik. AFFA-nın yaxşı işlər görmək istədiyini hiss edirik. Yenə də hakim nöqsanlarıyla üzləşdiyimiz halda bildirəcəyik. Bugünkü hakimlik normal oldu. Yaxşı şeylərdən danışmaq lazımdı. Əvvəl də Hakimlər Komitəsinin sədri vəzifəsinə edilən təyinatın düzgün olduğunu demişdim. İndi də həmin fikirdəyəm. Bu il keçən ilə nisbətən yaxşı yöndə dəyişikliklər olub. Addım-addım irəliləmək lazımdı. Bu il hakimliyin səviyyəsi artıb. Mübahisəli epizodlar şərh olunur. Bəzən yanlış cavablar verilir, bəzən də susurlar. Bunu da anlayışla qarşılayırıq. "CBC Sport" haqda da mənfi fikirdə deyilik. Hava şəraitindən xəbərdar idik. Mən özüm də "Şamaxı" ilə matça gedə bilməmişdim. "CBC Sport" ilboyu çox böyük əziyyət çəkir, ortaya ciddi iş qoyur. Sadəcə, matç azarkeşlərin izləməsi üçündü. Biz həm şamaxılı, həm də tovuzlu tərəfdarların oyunu izləməsini istəyirdik".

"Bizi hazırda maraqlandıran əsas məsələ nəticələrdi. Xallar toplamalıyıq. Son oyunlarda xeyli zədəlimiz oldu. Yavaş-yavaş toparlanırıq. Ümid edirəm ki, qışda aldığımız futbolçular kollektivə uyğunlaşacaq və ümidlərimizi doğruldacaq. Düşünülmüş transferlər etməyə çalışdıq. Avrokuboklara yollanmaq iddiamız davam edir. Matçdan-matça daha yaxşı oyun göstərəcəyik".