Ötən ilin sonlarında “Şamaxı”da sirli ayrılıqlar yaşanmağa başladı.

Qısa müddət ərzində əyalət təmsilçisi əsas heyətin üç üzvü ilə müqaviləni pozdu. Əvvəlcə İlkin Muradovun komandadan uzaqlaşdırılması ilə bağlı xəbər yayıldı. Bu ayrılığa “intizamsızlıq” adı qoyuldu. Amma konkret bu intizamsızlığın nədən ibarət olduğu, qovulan futbolçunun hansı günahı işlətdiyini bilmədik. Çox keçmədi ki, kapitan Adil Nağıyevlə gürcü legioner Georgi Kantariya klubdan qovuldu. Artıq şübhələnmək üçün yetərincə ciddi əsas var idi. Müxtəlif şayiələr dolaşmağa başladı. Bu şayiələrin də əsas məğzi ondan ibarət idi ki, qovulan futbolçular oyun alğı-satqısı ilə məşğul olub.

Həyatın qaydası belədi. Hanısa məsələdə doğru-düzgün açıqlama verilmirsə, insanlar işin əslini bilmirsə, orda mütləq dedi-qodu başlayır. Atalar məsəlində deyilmişkən, samanın düşməsi Zamanın ölməsinə çevrilir. Konkret bu hadisəylə bağlı da ortada rəsmi və dolğun heç bir açıqlama olmadığından şayiələrin də yayılması sürətləndi. Futbolçular da daş atıb, başını tuturdu ki, biz heç bir oyun alverində iştirak etməmişik, “Şamaxı”dan ayrılmağımızın səbəbi başqadı.

Sizin də yadınızda olar: “Şamaxı”nın baş məşqçisi Ayxan Abbasov mətbuat konfranslarının birində ona məsələ ilə bağlı ünvanlanan suala belə cavab verdi ki, klub futbolçuların qovulması barədə açıqlama yayacaq. Klubun açıqlaması da başdansovdu oldu, sözləri bir-birinin ardınca düzdülər, nə demək istədiklərini də heç kim başa düşmədi. Yəni həmin açıqlama da elə açıqlama vermək xatirinə verildi.
Amma cidanı çuvalda gizlətmək mümkün olmadı. AFFA İntizam Komitəsi Adil Nağıyevi futboldan ömürlük uzaqlaşdıranda yayılan söz-söhbətin də həqiqət olduğu aydınlaşdı.

Məlum oldu ki, tüstü od olan yerdən çıxıbmış. Klubun bu məsələdə cəsarətli davranmaması, digər futbolçuların da gözünün odunun alınmaması üçün həqiqətin açıq deyilməməsi şəxsən məni təəssüfləndirdi. Əksinə, belə məqamlarda zamanında həqiqəti aşkarlamaq lazımdı ki, bu fikrə düşənlər də sabah biabır olacaqlarından qorxub, əyri əməllərdən çəkinsinlər.

Təəssüf ki, “Şamaxı” örtülü bazarın dostluğu pozmasından xəbərsiz davranır, özünü “sirr dağarcığı” kimi aparmaqda davam edir. Məlumatınız var ki, əyalət təmsilçi hücumçusu Belajdi Pusi ilə yolları ayırıb. Yox, onu oyun alverinə görə qovmayıblar. Albaniyalı hücumçu Rusiya premyer-liqasıda çıxış edən Voronej “Fakel”i ilə razılıq əldə edib, ora yollanıb.

Bəli, futbolçu düzgün addım atıb, irəliləmək şansını dəyərlənirib. Təəccüblüdü ki, “Şamaxı” buna nəyin qarşılığında razılıq verib? Çünki komandanın özünün qol vuran hücumçuya ehtiyacı var. 21 xalla 8-ci pillədə qərarlaşan “Şamaxı” elitadakı yerini qorumaq uğrunda mürəkkəb bir yarışın içindədi.

Mövsümün bitməsinə 13 tur qalıb, sonuncu pillədəki “Səbail”lə xal fərqi isə cəmi 4-ə bərabərdi. Həmkarlarımın Pusiyə görə ödəniləcək məbləğlə bağlı sualına “Şamaxı”nın idman direktoru Kamran İsmayılov belə cavab verib: “Burda heç bir qaranlıq məsələ yoxdur. Sadəcə, biz maliyyə məsələlərini açıqlamırıq”. Əhsən sizə. Belə çıxır ki, indiyə qədər oyunçuların alış-satış qiymətlərini açıqlayanlar qeyri-peşəkarlardı, bircə siz hər şeyi yaxşı bilirsiz.

Ehtiyatlı olun, belə sirr verməməklə mövsümün sonunda elitanı tərk edə bilərsiz, arada “Şamaxı”nın düşdüyü çətin vəziyyəti də düzgün təhlil edin.

AMAL