“Valehin “Şimal”a keçidinin iki səbəbi var” – Yaşar Seyidov oğlunu niyə buraxıb?
2-ci liqada yarışan “Dinamo”nun bombardiri Valeh Seyidov gözlənilmədən komandasından ayrılıb.
Hücumçu bundan sonra “Şimal”ın uğurları üçün çalışacaq. Maraqlı məqam odu ki, Valeh atası Yaşar Seyidovun İdarə Heyətinin sədri olduğu “Dinamo”nu tərk edib.
Valehin “Şimal”a getməsinin səbəbi nədi? Daha çox maaş təklif etdilər, yoxsa klubun iddiasını əsas götürdü? Bu sualları Yaşar bəyə ünvanladıq:
“Valehin “Şimal”a keçidinin iki səbəbi var. “Şimal” 1-ci liqaya iddialıdı. O kluba dəstək olmaq məqsədilə gedib. “Şimal” Xaçmaz rayonunu təmsil edir və Valeh özü də şimal zonasından olduğunu görə gedib. “Şimal”ın rəhbərliyində təmsil olunanlar Valehin dostlarıdı. Dost kimi müraciət etdilər və mən də etiraz etmədim. Onların 1-ci liqaya iddiası var. Bizim 1-ci liqaya iddiamız qalsaydı, Valeh komandada qalardı. Çox istəyərdim ki, doğulub boya-başa çatdığım Xaçmazı təmsil edən komanda 1-ci liqada çıxış etsin. İmkan daxilində “Şimal”ın oyunlarını izləyəcəm”.
ƏSƏD SEYİDOV
