''Kənan bu mövsüm ''Yuventus''da çox şans qazanır və özünü göstərməyi bacarır. Mükəmməl istedada malikdi və yalnız 19 yaşda olduğunu unutmayaq. Bu yaşda ''Yuventus'' kimi klubun əsas heyət üzvü hesab olunması ona bəzən ağır gəlir. Ondan təcrübəli futbolçularda olan sabitliyi gözləmək düzgün deyil. Müdafiə olunmaq, rəqibi sona qədər qovalamaq da daxil olmaqla bəzi şeyləri necə etməli olduğunu bilir. Amma elə məqamlar da var ki, hələ onların üzərində işləməlidi. İlk növbədə son nöqtədə, yəni qərar vermək anında, qol və ya məhsuldar ötürmələr zamanı daha qərarlı olmalıdı. Son 16 metrədə daha sərbəst olmalıdı. Bundan başqa bunu dəfələrlə söyləmişəm ki, yeri gələndə ''çirkin'' qollar da vurmağı bacarmalıdı. Məsələn, qapıçıdan, müdafiəçidən dönən topu, eləcə də qapı önündə yaranan qarışıqlıq zamanı bir toxunuşla topu tora göndərə bilməlidi. O çalışır ki, hər zaman baxımlı qollar vursun. Onun oyununu izləmək insana zövq verir. Əsas mövqeyi sol vingerdi. Ancaq ikinci hücumçu, ya da hücumameyilli mərkəz yarımmüdafiəçisi kimi də oynamağı bacarır. Onun inkişafından məmnunam. Hakana gəlincə, son vaxtlar bir neçə dəfə zədə alaraq sıradan çıxmalı oldu. Bu da onun bir qədər enişli-yoxuşlu qrafik cızmasına səbəb oldu. Bu mövsüm hələ ki, maksimum səviyyəsinə çata bilməyib. Amma ''İnter'' onunla və onsuz iki fərqli komandadı. Hakana olan hörmətim 1 santimetr də azalmayıb. Əla oyunçudu və hər şeyə sahibdi. Taktiki zəka, texniki özəlliklər, xarakter, düzgün baxış tərzi, qalib mentaliteti... Meydanda fərq yaratmağı bacarır. ''İnter''də son vaxtlar əvvəlki dönəmlərə görə top hücuma gec çatdırılır. Komanda hücuma ləng çıxır. Bu da Çalhanoğlunun oyununa mənfi təsir göstərir''.