Yürgen Klopp “Red Bull” şirkətinin Avstriyanın Zaltsburq şəhərindəki mənzil-qərargahında keçirilən mətbuat konfransında bir çox aktual mövzularla bağlı fikirlərini jurnalistlərə çatdırıb.

Yeni işi…
Məşqçilik etməyi xoşladığımı həmişə demişəm. Lakin min oyun və mətbuat konfransından sonra özümü yeni bir işdə sınamaq istədiyimi anladım. İndi mənim fantastik komandam var. Mario Qomes (Almaniya yığmasının sabiq hücumçusu – red.) bu komandanın üzvlərindən biridi. Məşqçi kimi çalışarkən strateji inkişafa da diqqət yetirirdim. İnfrastruktur və mədəniyyət ilə həmişə maraqlanmışam. Bunlar klubda həmişə yaxşılaşdırılması mümkün olan amillərdi. Və hərdən bu planda yeni adamın baxışına ehtiyac duyulur. Karyeram ərzində işlədiyim hər klub mənim gəlişimdən gedişimə qədər dəyişmə prosesindən keçib. İstəsəniz, məni “futbolun həkimi” adlandıra bilərsiz. Mən lazım olduğum yerdə kömək edirəm.

…“Red Bull”a daxil olan klubların tənqidi…
“Leyptsiq”in “Verder” ilə oyununa yollandım və stadiona 47 min azarkeşin gəldiyini öyrəndim. Onlardan 42 mini “Leyptsiq”ə azarkeşlik edirdi. Öz-özümə “məgər onlar yaxşı futbola layiq deyillər” sualını verdim. Və yalnız Leyptsiqdə yoxl, burda – Zaltsburqda, həmçinin “Red Bull”a daxil olan klubların çıxış etdiyi Nyu York, Yaponiya və Braziliyada da vəziyyətin yaxşıya doğru dəyişməsi niyə də olmasın?! Futbolun regiona sevinc bəxş etməsini çox xoşlayıram.

…məşqçi işi…
Mən “Leyptsiq”i və ya “Red Bull”a daxil olan hər hansı digər klubu çalışdırmayacağam. Sizə bununla bağlı bacardığım qədər zəmanət verirəm: mən burda məşqçi kimi işləməyəcəyəm. Ümid edirəm ki, bu sualın aktuallıq qazanmamasına şərait yaradan sistemi qura biləcəyik.

…“Liverpul”un hazırkı uğurları…
Sabiq komandamın işlərinin yaxşı getməsinə çox sevinirəm. Arne (komandanın hazırkı baş məşqçisi Slot – red.) və bir çox futbolçularla arabir yazışıram. Onlara uğurlar diləyirəm. Komandanın oyunlarına imkan daxilində baxıram.

Yeri gəlmişkən, hamıya “Liverpul”un matçlarını izləməyi məsləhət görürəm. Hətta onlara azarkeşlik etməsəniz belə, bunu edin. Çünki “Liverpul” əla futbol sərgiləyir. Bu, çox güman, indi dünyanın ən balanslaşdırılmış komandasıdı.

…“Liverpul”un ulduzlarının müqavilələri…
Artıq “Liverpul”da işləmədiyimə və sizin bir sıra oyunçuların müddəti başa çatmaqda olan müqavilələri haqda daimi suallarınızı cavablamadığıma görə şadam (Vircil van Diyk, Trent Aleksander-Arnold və Məhəmməd Salahın müqaviləsi mövsümün sonunda qüvvədən düşəcək – red.). Sizə verə biləcəyim yeganə cavab bu məsələnin uğurla həllini tapması olacaq. Hər üç oyunçunun müqaviləsini yeniləməsini istərdim, amma məsələnin detalları haqda heç nə bilmirəm. Onlar mənə heç nə deməyiblər. Onlardan bu haqda soruşa bilərəm.

… Aleksander-Arnold…
Kiminsə Trentin müdafiədəki oyununu hələ də müzakirə etməsinə inana bilmərəm. Yaxşıdı ki, bu, artıq məni qayğılandıran məsələ deyil. Mətbuat konfranslarında Arnedən bu haqda bir neçə dəfə soruşulduğunu bilirəm. Mənim reaksiyam? Onlar nə üçün indiyədək anlaya bilməyiblər?! Bəli, Trent “Mançester Yunayted”ə qarşı o qədər də yaxşı oynamadı. Amma gəlin, bu səs-küyü Trentin yaxşı oyunlarından sonra da salın.

…Salah…
Onun komandada qalacağına ümid edirəm. Salah müasir futbolun böyük hücumçusudu. Fantastik adamdı. Misirin ölkə xaricində ola biləcək ən yaxşı səfiridi. Fantastik idmançıdı.

…yenilənmiş KDÇ…
“Zaltsburq”un formatı yenilənən Klublararası Dünya Çempionatında (KDÇ) iştirak edəcəyini bilirəm. Amma bu turniri xoşladığımı soruşsaz, “yox” cavabını verərəm. Ona görə ki, KDÇ yeni formatı ilə faydasız yarışdı, bizi yay tətilindən məhrum edəcək. Kuboku qazanan komanda ən bədbəxt çempion olacaq. Çünki həmin komanda yayboyu rəsmi oyun keçirəcək və az müddət sonra yeni mövsüm başlayacaq. Avropa futbolu onsuz da zədə problemi içindədi.

Fikrimcə, elə bir vaxt gələcək ki, matçların sayını azaltmağa məcbur olacağıq. Və ya komandaların heyətini genişləndirmək lazım gələcək. Başqa çıxış yolu yoxdu. Hərdən gec-gec gördüyün nəsə sənə daha xoş görünür.

…və MS-nin mümkün cəzalanması haqda
“Mançester Siti”nin son illər qazandığı bütün titulları “Liverpul”a versələr, bunu bayram etməyi düşünən hər kəsə Malyorkaya bilet sifariş etməyi məsləhət görərəm (Böyük Britaniya mənbələri artıq uzun müddətdi MS-nin çox sayda maliyyə qaydalarını pozduğu üçün ağır sanksiyalara məruz qalacağını xəbər verir – red.). Birlikdə şadyanalıq edəcəyim hər kəsə pivə alacam. Evimin yaxınlığında parad təşkil edəcəm.

Sizə necə sərlövhələr hədiyyə etdim! Təhqiqatın necə nəticələnəcəyinə baxarıq, indi mən, ümumiyyətlə, bu məsələ haqda heç nə düşünmürəm.